Cada dissabte, gràcias a Clamenç Pech, presentarem dins Jornalet un personatge istoric del país nòstre, extrach de la cronica de Ràdio Occitània “L’occitan del jorn”, que se difusa de diluns a divendres dins l’encastre de l’emission “L’ora del tè” entre 17h e 18h.

La Carrièra de l’Abadiá. Es un d’aqueles endrets que correspondon a l’imatge que nos podèm far del vièlh Niça. Es una carrièra estrechona, ont la lutz perven pas gaire e ont los vesins pòdon comunicar sens tròp de mal, sens bolegar de lor fenèstra, puèi que son bravament pròchas. Aquí, al numèro sièis d’aquela carrièra, se tròba una sala d’espectacle de la ventalha simpla, sens pretension mas amb una granda mission: far jogar de comedians del parçan.
 
Sa programacion compren de one man shows, de comèdias o alara de pèças de teatre culte coma Lo sopar de cons o encara Lo prenom interpretadas per de comedians de la region. Lo Théâtre des Oiseaux, Teatre dels Aucèls, es bailejat per Benoît Tessier e la companhiá Teatre Segurana mas foguèt fondata l’origina per Noëlle Perna, mai coneguda per son personatge de “Mado la Niçoise”.
 
Noëlle nasquèt pas a Nissa la Bèla mas pas tròp luènh, puèi que nasquèt en 1954 dins lo nòrd-èst d’Argeria dins l’actuala vila d’Skikda, ancianament apelada Philippeville, del temps de la colonizacion francesa. Sos parents, d’origina italiana, i tenián un restaurant e, un còp arribats dins la Comtat, tornèron prene un bar, apelat… “le Bar des Oiseaux” dins la vila vièlha. Noëlle se prenguèt l’afar a vint ans, en 1964, e son comptador foguèt son primièr empont. Dins son percors indicat sus sa ficha Wikipèdia, trobam una cronica ràdio sus la locala niçarda de Radio France, un fulheton apelat Le Bar des Oiseaux difusat per FR3 entre 1986 e 1997, e tot un fais d’espectacles e de one woman shows entre 1997 e 2002.
 
Es en 1999 que decidiguèt de crear lo Teatre dels Aucèls, al ras de son bar. Es dins aquel periòde que nasquèt lo personatge de Mado la Niçoise, que faguèt son aparicion pel primièr còp en 2002. Ajocada sus de talons, vestida d’una ròba ròse bonbon motlanta, es un personatge que te fa de filosofia de proximitat tot en se trufant dels travèrses del nòstre temps. E dempuèi quasi vint ans, Noëlle Perna la fa se passejar sus totes los emponts exagonals amb un accent meridional nasejant mas, e mai vendèsse  son bar en 2015 e balhèsse lo teatre tres ans mai tard a una tèrça companhiá… l’umorista oblida pas d’ont ven. Se la femna nasquèt en Argeria, la comediana se desvelhèt dins una carrièra estrechona de la vila vièlha.