Era revendicacion der occitan coma lengua veïculara ena educacion aranesa mèrque enguan era corsa “Aran per sa Lengua”, que torne ara normalitat ena sua 28u edicion. Atau, er eveniment aurà lòc dimenge que ven, 31 de junhsèga, jos eth lèma “Cap pas endarrèr, aranés lengua veïculara”, e se clauarà damb eth tradicionau concèrt de Nadau.
 
Era corsa “Aran per sa Lengua” ei ua des hèstes revendicatiues mès populares dera Val d’Aran. Es participaires s’amassen d’ora de maitin enes tres extrèms deth país: Montgarri, Les e eth Pòrt de Vielha, e partissen a pè o en tot córrer, e en tot minjar o en tot béuer amassa laguens es viles deth percors. Ei de soslinhar aguest esperit conviviau que mèrque era jornada de tot un país en movement pera lengua.
 
Ath ser, toti s’amassen ena plaça dera glèisa de Vielha, a on se harà a sénter es revendicacions der aranés ena societat, e entà qu’era lengua demore veïculara ena educacion publica. Coma cada an, s’autrejarà eth prèmi Lengua Viua e se clauarà era jornada damb un concèrt de Nadau, que, coma cada an, harà a dançar as joeni e as mès grani en encastre d’un concèrt fòrça animat.