Òsca pels joves U17 franceses que rescontravan lors correspondents angleses a Selon de Provença aqueste divendres 22 de julh en fin de vèspre. Los angleses marcavan los primièrs per menar 10-0, mas los Blaus prenián l’avantatge abans la pausa (20-10), puèi desrotlavan dins lo segond temps per s’impausar 50-10. Se desirariá que de talas resultas se contunhèsson dins las categorias superioras!
 
Òsca tanben per las Divessas Catalanas que jogavan aqueste dimenge lo campionat anglés de rugbi de IX. A Salford, en pola, perdèron contra las futuras venceiras: York (8-16), mas batèron Warrington (22-7). En mièja finala, opausèron una brava resisténcia a Leeds lo primièr temps abans de s’inclinar: 7-23.
 
 
E un tombat assuquèt los Gigants!
 
A Perpinhan, l’entraïnaire McNamara deu compausar amb los nafrats e los suspenduts per poder presentar una formacion catalana que tenga la rota. En jòc, amb la recepcion dels Gigants d’Huddersfield aqueste dissabte 23: la tresena plaça.
 
Una patanada a la recepcion d’un còp de pè e los angleses marcan l’ensag. Los catalans replicaràn per un ensag de Romano en cap de linha: 4-4 a la pausa.
 
Los Sang e Aur prenon l’avantatge sus una traucada de Benjamin Jullien que Tomkins transforma. Los catalans dominan, mas sus una accion de 100 mètres los angleses egalizan. Huddersfield pren l’avantatge sus penalitat; Sam Tomkins replica: 12-12 e demòra 5 minutas de jòc.
 
Lo primièr ensag de tombat de Pearce tusta sul pal, endavant anglés, mesclanha e aqueste còp, Sam Tomkins tusta e ensaca lo tombat d’una victòria arrancada amb plan de dificultat: 13-12. Los catalans tornan prene la tresena plaça e reçaupràn Leeds dissabte que ven (19h). Una esquipa de Leeds que ven de passar un 42-12 a Wigan!
 
 
Lo TO ten pas la distància
 
Lo Tolosa Olimpic veniá d’encadenar tres victòrias e comptava plan de contunhar la tièra amb la recepcion de Salford. Los occitans marcan los primièrs, los angleses egalizan. Un tombat de Gigòt e una penalitat d’Hankinson permeton als blaus de menar 9-6 a la pausa. Ensag dels angleses tre la represa, puèi Hankinson torna balhar l’avantatge als locals, mas Salford va marcar dos ensages e una penalitat per ganhar 24-11. Aqueste divendres, Tolosa acabarà sa tièra de recepcions fàcia a Hull FC a 7 oras del vèspre.
 
Dimenge, l’adversari dels Occitans per la davalada en Championship recebiá los primadièrs de Saint Helens. De segur, Walkefield se vòl salvar la pèl. A la fin del temps impartit, las doas formacions èran a egalitat: 12-12. Al punt en aur, Jack Welsby passèt lo tombat que balha la victòria als campions (13-12) e l’espèr de salvament per Tolosa.
 
 
NRL: Quand la Tempèsta vira al ventolet…
 
En Austràlia, los Cavals Fòls de Brisbane van ganhar a Parramatta 36-13. Los Polets s’impausan a Newcastle 42-12. La Tempèsta de Melbourne, privada de son arrièr Papenhuyzen duscas a la fin de sason (nafrat al genolh: fractura de la noseta) , subisson la lei dels Lapinons 24-12. Penrith contunha la corsa en cap del classament: victòria 20-10 fàcia a las Làmias.
 
 
Quand la còrna es pas la fin de la fin…
 
Aqueste dimenge, los Vaquièrs (segonds de l’NRL) recebián los darrièrs: los Tigres. A la pausa, los vesitaires menavan 16-6. Mai entreprenents, los Vaquièrs prenián l’avantatge 25-18 a la 74a minuta. Los Tigres marcavan dos ensages per menar 26-25 a la 79a minuta. Lo tust de transformacion tocava lo pal. Demorava una segonda de jòc. Lo còp de pè de relança foguèt culhit per un Tigre: èra la granda espetada de jòia pels vesitaires. Mas l’arbitre e l’arbitre vidèo trapèron qu’un Tigre aviá copada la rota d’un Vaquièr! Genre de decision que se’n pòt charrar d’oras e d’oras. Fin finala, Valentin Holmes passèt la penalitat de la victoria dels Vaquièrs: 27-26! Contentament dels Vaquièrs e sonque los uèlhs per plorar pels Tigres!
 
Sovent, un pichon punt es plan mai qu’un punt!
 
 
 
 
Alan Roch