capçalera campanha

Actualitats

La massificacion toristica al K2

Un sherpa a publicat un vidèo que mòstra una coa longassa d’escalaires dins un dels còls mai perilhoses de l’ascension

Tèxte legit

Lo K2, la segonda montanha pus nauta del Mond e la pus elevada de Paquistan, es considerada coma una de las cimas pus complicadas pels alpinistas. Pasmens, es pas engardada de la massificacion del torisme de montanha que tanben la patís Chomolangma (tanplan dich Sagarmatha o mont Everest).
 
Un sherpa nomenat Mingma G, qu’arunan participèt a l’expedicion que capitèt a aténher la cima del K2 pel primièr còp en ivèrn, a publicat suls rets socials un vidèo que demòstra lo perilh d’aquela massificacion. S’i pòt veire una coa longassa d’escalaires qu’avançan dins un dels còls mai perilhoses de l’ascension a 8200 mètres d’altitud.
 
Los imatges se filmèron lo 22 de julhet, e dimècres passat se difusèron publicament. Precisament aquel jorn s’establiguèt lo recòrd d’alpinistas que trepegèron la cima K2: 141, dont la majoritat de sherpas paquistaneses qu’ajudavan de toristas alpinistas occidentals.
 
De fach, una seguida d’avalancas dins aquel còl foguèt una de las principalas causas del famós Desastre del K2 de 2008, ont moriguèron 11 escalaires.
 
 
Lo nom de la montanha
 
Lo K2 se tròba en Cashmir, a la frontièra politica entre China e Paquistan, dins una region reclamada per Índia. Son nom ven de la còla britanica qu’i anèt en 1856 e que lo sonèron K2 perque es la segonda montanha de la cadena de Karakoram. Las autoritats chinesas nomenan aquela montanha Qogir, una adaptacion de “chhogo ri” qu’en lenga balti vòl dire “montanha granda”. Pasmens, aquel nom es pas emplegat localament, pr’amor que la montanha es pas visibla de las zònas abitablas e vesitadas tradicionalament pels abitants. Los baltis apèlan la montanha “Ketu”, qu’es lor adaptacion del biais anglés de prononciar K2.
 
 


abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article