Los èx-oficièrs de la polícia de Minneapòlis (Estats Units), Alexander Kueng e Tou Thao, son condemnats a tres ans de preson e tres ans e mièg respectivament, per aver mancat als dreches civils del ciutadan afroamerican George Floyd. La senténcia la diguèt dimècres passat un jutge federal dels Estats Units.
 
Kueng e Thao, e tanben lor èx-collèga Thomas Lane, foguèron ja declarats en febrièr colpables d’aver privat Floyd “de son drech constitucional d’èsser liure de l'indiferéncia deliberada d’un policièr envèrs sos grèus besonhs medicals”. Lane, un autre dels agents de la polícia de Minneapòlis implicat dins l’assassinat de Floyd, foguèt ja condemnat a dos ans e mièg de preson per aver pas respectat los dreches constitucionals de Floyd pendent aquela tragica arrestacion del 25 de mai de 2020 durant la quala lo tuèron.
 
Los procuraires avián demandat per Kueng e Thao una senténcia fòrça pus nauta que la de Lane, mas inferiora a la de Derek Chauvin, lo principal responsable d’aquela mòrt que causèt de fòrtas protèstas pertot.
 
Floyd foguèt arrestat en mai del 2020 a la sortida d’un establiment per aver utilizat un bilhet fals per tal de pagar un paquet de cigarretas. Pendent l’operacion, foguèt manotat e tombat per tèrra, e Chauvin clavèt lo genolh sul còl de la victima pendent nòu minutas, malgrat los avertiments de Floyd que podiá pas respirar. Sa mòrt, enregistrada en vidèo, tresvirèt lo Mond entièr.