Dos foncionaris de la preson d’Arle —l’èx-directritz e un susvelhant— faràn l’objècte de “proceduras disciplinàrias” per la mòrt del presonièr independentista còrs Yvan Colonna, çò anoncièt dijòus la primièra ministra francesa, Élisabeth Borne, après un rapòrt definitiu de l’Inspeccion Generala de la Justícia que senhala plusors mancaments de part del personal de la preson camarguenca. Borne tanben anoncièt la publicacion del rapòrt.
 
Segon aqueste, lo susvelhant en question demorava “sens cap de motiu alonhat” del luòc dels faches, quand Colonna patiguèt son agression brutala. Quant a l’anciana cap de l’establiment, lo rapòrt senhala “l’insufisença” de sa direccion e l’abséncia de “gestion apropriada” de las comissions d’avaloracion de la perilhositat dels detenguts.
 
L’assassin de Colonna, Franck Elong Abé, èra un presonièr de 36 ans amb un espés passat delictiu. Complissiá ara sa condemnacion a Arle per “associacion de malfactors terroristas” après èsser detengut en Afganistan.
 
Borne demandarà al ministre de la justícia “una mission d’inspeccion suls quartièrs d’avaloracion e presa en carga de la radicalizacion” (QER), un dispositiu desplegat fa 5 ans pel qual “pareis necessari d’entamenar un bilanç”.
 
Ara, l’avocat de Colonna, Emmanuel Mercinier-Pantalacci, planh que las responsabilitats dels foncionaris permetan pas de senhalar la “responsabilitat fondamentala del poder politic qu’empediguèt deliberadament Yvan Colonna de purgar sa pena près d’en çò sieu, en violacion de las règlas penitenciàrias, per revenge d’estat”.