CAPÇALERA PAIS INVISIBLE

Actualitats

InternacionalSocietat

Itàlia: commocion per l’assassinat en plen jorn d’un vendeire nigerian

L’omicida li prenguèt la cròça e lo batèt fins a lo tuar perque aviá mendicat amb insisténcia

Tèxte legit

L’assassinat per carrièras en plen jorn d’un vendeire nigerian a Civitanova Marche, al centre d’Itàlia, a esmogut la societat italiana e a descadenat un debat sus la violéncia racista al país e las criticas de l’indiferéncia dels passejaires qu’assistiguèron al crime sens intervenir. La victima s’apelava Alika Ogorchukwu, aviá 39 ans, èra maridat e aviá un enfant d’8 ans. Lo tuèt divendres de tantòst un òme sonat Filippo Claudio Ferlazzo, de 32 ans, que, segon de mèdias locals, èra conegut per la polícia. Ferlazzo es detengut, acusat d’omicidi volontari e de panatòri, car après l’agression emportèt lo telefòn mobil de la victima.
 
L’enquista es totjorn dobèrta, mas la polícia assegura que i a pas d’elements que permetan de conclure que s’agisca d’un crime racista. L’agression “sembla d’aver sorgit” quand Ogorchukwu mendicava. Ferlazzo a dich a la polícia qu’ataquèt lo vendeire pr’amor qu’aviá fach “de comentaris” sus sa calinhaira, que l’acompanhava. Mas segon l’enquista, Ferlazzo auriá atacat e tuat Ogorchukwu pr’amor qu’aqueste li demandava l’almòina amb insisténcia.
 
L’omicida a demandat “perdon” a la familha d’Ogorchukwu per mejan de son avocata, mas a afirmat que l’agression arribèt perque la victima “mendicava amb insisténcia” e que prenguèt la calinhaira del murtrièr al braç. “Es un gojat amb de problèmas psiquiatrics”, çò a precisat l’avocata a prepaus de Ferlazzo, que, segon ela, demòra a Civitanova dempuèi qualques meses e se tròba “en un estat de confusion”.
 
Tota la societat politica italiana a condemnat lo crime, compreses los ultradrechistas Matteo Salvoni e Giorgia Meloni, totjorn critics envèrs l’immigracion.
 

Una agonia d’entre tres e quatre minutas
 
Ogorchukwu se trobava dins una carrièra plan centrala de Civitanova, vila toristica de la còsta de la mar Adriatica. Caminava ajudat d’una cròça. Al moment de l’agression, coma se pòt veire suls rets socials dins divèrses vidèos enregistrats pels passejaires, Ferlazzo li prenguèt la cròça e lo tustèt amb fòrça, li sautèt dessús fins a lo tuar. Segon l’enregistrament de las camèras municipalas de susvelhança, l’agonia de la victima durèt entre tres e quatre minutas, sens que degun gausèsse intervenir. Simplament qualques unes cridèron a l’agressor qu’èra a mand de tuar la victima.
 
De collectius antiracistas e la comunautat nigeriana manifestèron dissabte per demandar justícia e reclamar la fin “del racisme contra los negres”.

 
 
 
 
 
 


abonar los amics de Jornalet

 



 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article