De policièrs de la Direccion Centrala de l’Intelligéncia Interiora (DCRI) —una agéncia de l’estat francés— arrestèron dijòus passat dos joves de 18 e 20 ans, qualificats de “potencialament perilhoses”, a Marinhana (País Marselhés). Segon la polícia, èran “prèstes a passar a l’accion” e “a fabricar d’explosius”.

La DCRI seguissiá lor activitat per Internet segon çò que raportèt una font policièra a l’AFP. Avián recentament enviat un “e-mail de menaça” en visant lo president american Barack Obama e avián “manifestat la lor intencion de se procurar d’armas” e mai d’explosius de tipe TAPP que volián confeccionar” per “passar a l’accion”. Lor caliá aquerir los produches aferents, çò manifestèt aquela font qu’apondiá que los joves arrestats son “potencialament perilhoses” e que “podèm pas prene de risques”.
 
De fach, los joves avián publicadas sus Facebook de fòtos d’eles amb d’armas a la man e se metián en scèna coma los jihadistas de qualques vidèos, tanben publicats sul lor Facebook.
 
Segon de fonts judiciàrias, aquelas interpelacions se son menadas a tèrme dins l’encastre d’una enquèsta prèvia dobèrta tot recentament per “associacion de malfactors en vista de preparacion d’actes terroristas”.
 
Lo Ministèri de l’Interior a declarat a l’AFP que los dos gojats èran “suspèctes de preparar d’actes de terrorisme, d’èsser en possession d’armas e de fabricar d’explosius”. Òm los aviá “detectats en novembre de 2012 per de messatges e de consultas jihadistas sus Internet”. Aqueles “dos individús an fach l’objècte d’una estrecha vigilància, qu’a donat luòc a la dobertura d’una enquèsta judiciària”.
 
“La descobèrta recenta de la volontat d’aqueles joves de se procurar d’elements per la fabricacion d’explosius e de passar a l’accion a menat a la lor interpelacion”, segon l’Interior.
 
Lo ministre de l’Interior, Manuel Valls, saludèt “l’accion dels servicis de polícia e d’intelligéncia qu’an, aquestes darrièrs meses, permés de metre en defòra d’estat de portar tòrt de filièras e d’individús particularament perilhoses.” Dins aquel sens, lo ministre apondèt qu’“en França i a uèi divèrses desenats de Mohamed Merah potencials”. “Totes passan pas a l’accion mas cal èsser prevenguts”.  De fach, Valls a parlat en divèrsas escasenças d’un “enemic interior qu’es fruch d’un procès de radicalizacion”.