En seguent de partidas de Liga dei Campions, se jogava dijòus passat leis ochens de finala anar de la Liga d’Euròpa de l’UÈFA. Solet club de l’Exagòn encara en competicion, Bordèu èra opausat au Benfica Lisbona.

Passèt pas luenh. Ièr de ser, a l’Estádio da Luz, lei Girondins de Bordèu perdèron per la mai pichona marca, 1 a 0. Pasmens lei bordalés tombèron pas sus un grand Benfica que profechèt solament d’una error de Carrasso per marcar. L’ancian marselhés faguèt entrar lo balon dins sa gàbia après un tir de Rodrigo. En manca d’eficacitat e maugrat de bòneis ocasions en fin de partida, Bordèu a pas capitat d’egalizar e deurà donc jogar una polida partida dins una setmana a Chaban Delmas per esperar la qualificacion. Sens aver marcat a l’exterior a la partida anar, faudrà èstre atentiu en defensa, mai faudrà tanben marcar aumens un còp. Per aquò, Bordèu pòu comptar amb lo retorn de Cheick Diabaté qu’aqueste an es mai que mai eficaç en competicion europèa.
 
Dins leis autrei partidas de la Liga d’Euròpa, fau notar la victòria aisida de Tottenham còntra l’Inter. Lo club de Londres atomizèt lo club milanés 3 a 0. Bale marquèt lo primier, seguit per Sigurðsson e Vertonghen. Tottenham es grand favorit abans la partida retorn.
 
Per còntra, Chelsea manquèt completament sa partida ièr: opausats a la pichona esquipa de l’Steaua Bucarèst, lei londinencs perdèron 1 a 0 a l’exterior, un gòl de Rusescu sus penalti. Pasmens es totjorn possibla la qualificacion per lei quarts de finala, la victòria en aquela competicion demòra l’objectiu primier per Chelsea, campion de la Granda Copa d’Euròpa l’an passat e eliminat aqueste an en fasa de pola.
 
Leis autrei resultats de la serada:
 
Stuttgart – Lazio Roma 0-2
Basilèa – Zenit 2-0
Anzhi – Newcastle 0-0
Llevant – Rubin Kazan 0-0
Viktoria Plzeň – Fenerbahçe 0-1




Matieu Casanòva