33 partits politics e organizacions de la societat civila de Burkina Faso an anonciat la creacion d’un Front Patriotic per entamenar un procès de transicion après lo còp d’estat de genièr passat, que menèt a la destitucion del president Christian Kaboré. L’anóncia se faguèt lo 4 d’agost a l’ocasion de l’anniversari de la revolucion de Thomas Sankara de 1983, que comencèt una transformacion sociala e culturala pionièra en Africa.
 
Aqueste Front Patriotic cèrca de restablir la democracia e critica l’actual govèrn. Son coordinator, Germain Bitiou Nama, a dich que lo poder dels militars “foguèt impausat a travèrs de messorgas e d’enganas” e a criticat que “jos l’escampa d’una reconciliacion, se son meses a restaurar lo regim de Blaise Compaoré”.
 
 
Lo retorn de Compaoré
 
Compaoré, destituit après una tièra de mobilizacions popularas en 2014, vesitèt Burkina Faso en julhet per parlar de la situacion politica e de la  seguretat amb lo cap dels militars, lo luòctenent coronèl Paul-Henri Sandaogo Damiba, e d’autres èx-presidents. De remembrar que Compaoré foguèt condemnat en abril passat a perpetuitat per son ròtle dins l’assassinat de Sankara en 1987.
 
“Lo pòble burkinabe a comprés que la reconciliacion promesa es pas qu’un embalatge de contrabanda per fin de reabilitar los complices civils e militars en conflicte amb la justícia”, çò a dich Nama tocant a prepaus del retorn de Compaoré. Per aquesta rason, a acusat Damiba e lo govèrn de transicion de “perjuri e nauta traïson” per aver permés que l’èx-president tornèsse al país per una reünion malgrat lo mandat de detencion internacional en vigor.
 
Per tant, a dich que lo Front Patriotic espelís coma front de lucha “fàcia a la malescasuda de l’estat, a l’impoténcia davant lo terrorisme, a la reculada de las libertats, al refús de justícia e a las messorgas de l’estat”.
 
Lo putsch de Damiba se volguèt justificar per l’idèa d’afrontar la manca de mejans per combatre lo jihadisme. A comptar d’alavetz, la Comunautat Economica dels Estats de l’Africa Occidentala (CEDEAO) a mantengut de contactes amb lo govèrn putschista per ensajar de pachar un procès de transicion e una data per d’eleccions.
 
 
Un putschista format en França
 
Paul-Henri Sandaogo Damiba es diplomat de l’escòla militara de París. En 2017, foguèt entre los oficièrs estrangièrs diplomats de la 24a promocion de l’escòla de Guèrra.
 
Es titular d’un mastèr 2 en sciéncias criminalas del Conservatòri Nacional de las Arts e dels Mestièrs (lo CNAM) de París ont seguiguèt los corses del criminològ Alain Bauer.
 
Damiba aviá fach partida de l’èx-RSP, lo regiment de seguretat presidenciala de Blaise Compaoré, òme fòrt e autoritari de Burkina Faso de 1987 a 2014, retirat del poder per un soslevament democratic que dissolguèt l’unitat de Damiba e que causiguèt, el, lo camp de la democracia. Un an pus tard, Damiba e d’autres oficièrs se’n desmarquèron dins una primièra temptativa de còp d’estat militar.
 
 
La dimension economica
 
E mai siá un dels païses pus paures de la planeta, Burkina Faso ten de minas de coire, de fèrre, de manganèsi, d’aur, de cassiterita (mineral d’estanh) e de fosfats. Es lo 4n productor d’aur d’Africa. De soslinhar que l’aur es un element indispensable per far d’espleches electronics coma los telefòns mobils. En mai d’aquò, los fosfats son indispensables per produire de fertilizants. Dempuèi l’enebicion de l’Union Europèa d’importar de fosfats de Russia se crenh una crisi alimentària en Occident.