China s’es prononciada sus la nòva lei estatsunidenca de produccion de microchips en la qualificant de “destabilizaira”. Lo pòrtavotz dels afars exteriors chinés, Wang Wenbin, assegurèt dimècres passat que Washington cercava de “sabotar las cadenas de provesiment mondialas de semiconductors e creariá d’obstacles pel comèrci internacional, çò que China s’i opausariá”. Dins aquel sens lo pòrtavotz diguèt que la nòva lei estatsunidenca “restrenh l’investiment e las activitats comercialas e economicas normalas de las entrepresas chinesas, e tanben limita la cooperacion scientifica e tecnologica entre China e los Estats Units”. En fin, demandèt als Estats Units de respectar çò establit per l'Organizacion Mondiala del Comèrci (OMC) suls principis de dobertura, transparéncia e non-discriminacion.
 
La Lei dels Chips e de Sciéncia signada dimars pel president estatsunidenc, Joe Biden, dispausa gaireben de 53 miliards d’èuros en subvencions amb la tòca de véncer “la concurréncia economica del sègle XXI”.
 
Fa 30 ans, los Estats Units produsián lo 40% de la produccion internacionala de microchips, mas ara ne produtz pas que lo 10% fàcia al desvolopament enòrme que lo coneis l’indústria chinesa.
 
 
Lo 63% de la produccion mondiala se fa en Taiwan
 
Actualament, la crisi dels microchips es venguda lo combat geopolitic pus grand del Mond. La penúria de semiconductors e la dependéncia de Taiwan inquieta los mercats e damatja l’indústria automobila e d’autras. Lo 63% de la produccion mondiala dels semiconductors se fa en Taiwan, mai que mai en çò de la societat Taiwan Semiconductor Manufacturing Co (TSMC). Puèi, la sud-coreana Samsung produtz lo 18% dels semiconductors mondials e la chinesa SMIC lo 6%. Actualament, los microchips son al centre del combat geopolitic pus grand que i aja al Mond, e Euròpa, que n’aviá fabricats fòrça, se tròba ara sens defensa.