Tirs per l’aire e còps de cròça: las fòrças de l’òrdre del regim taliban dispersèron amb violéncia dissabte a Kabol una manifestacion de femnas pel drech al trabalh e a l’educacion, un an après l’arribada al poder dels integristas islamistas en Afganistan.
 
Una quarantena de femnas que demandavan “pan, trabalh e libertat” desfilavan devant lo Ministèri de l’Educacion quand un grop de combatents talibans las intimidèron en tirant per l’aire, tanlèu entamenada la marcha.
 
Las manifestantas portavan una bandeiròla sus la quala se podiá legir: “Lo 15 d’agost es un jorn negre”, en referéncia a la data de la presa de Kabol en 2021 pels talibans. “Justícia! N’avèm nòstre sadol de l’ignorància!”, çò clamèron abans d’èsser dispersadas violentament.
 
De talibans en tenguda militara e armats de fusilhs d’assaut bloquèron un caireforc davant las manifestantas comencèron a tirar per l’aire pendent de longas segondas. Un d’eles simulèt quitament un tir contra las manifestantas, çò rapòrta un jornalista de l’AFP.
 
Cèrtas manifestantas se refugieron puèi dins de botigas pròchas ont foguèron perseguidas e puèi batudas a còps de cròça de fusilh pels talibans. Confisquèron egalament los telefòns mobils de las manifestantas. De jornalistas foguèron tanben tustats.
 
Las manifestacions de femnas per reclamar mai de dreches son de mai en mai raras dins la capitala, subretot après l’arrestacion en debuta d’annada d’organizairas d’aqueles recampaments, dont qualques unas foguèron detengudas durant plusors setmanas.
 
 
Vel integral obligatòri en public
 
Dempuèi lor retorn al poder en agost passat, los islamistas fondamentalistas an progressivament tornat rosegar las libertats conquistadas per las femnas aquestas 20 darrièras annadas.
 
An impausat una sèria de restriccions a la societat civila, dont una granda partida pretendon de sometre las femnas a lor concepcion ultraintegrista de l’islam.
 
Las femnas las an largament exclusas dels emplecs publics, an limitat lor drech de se desplaçar, e an enebit l’accès de las dròllas al collègi e al licèu.
 
La darrièra restriccion data de la debuta de mai, quand lo govèrn publiquèt un decret, aprovat pel cap suprèm dels talibans e d’Afganistan, Hibatullah Akhundzada, que rend obligatòri per las femnas lo pòrt del vel integral en public.
 
Los talibans an precisat que lor preferéncia anava a la burqa, mas que d’autres tipes de vel que daissan aparéisser sonque los uèlhs serián tolerats.
‘
An tanben avalorat qu’es “melhor per las femnas de demorar a l’ostal”, franc de situacions d’urgéncia
 
 
 
 

Afghan women assembled in Kabul today to protest for their rights: Education. Freedom. Work. Food. 1/2 pic.twitter.com/xYjd9F6xNq

— Sandra Petersmann (@PetersmannS) August 13, 2022

 

Afghan women protest in Kabul on Saturday morning, demanding their rights around the first anniversary of the Taliban takeover of Afghanistan. Taliban opened fire to disperse the relatively small crowd. pic.twitter.com/9V0jaj1jAV

— Amu TV (@AmuTelevision) August 13, 2022