Dimèrcs 25 d'abriu, la direccion anoncièt la barradura de la fabrica lo 10 d'agost. Shens possibilitat de decalar la data un còp mei, totun. La fabrica diuré foncionar a 10% de l'activitat maximala, los darrèirs temps. La CGT (sendicat majoritari) bremba que l'enterpresa americana Freescale, beneficiària, causís de barrar lo sit de Tolosa per volontat estrategica, entà tornar la produccion aus Estats Units. Una partida de l'activitat serà encara mantinguda, e los emplegats deu sector Recerca e Desenvelopament demoraràn suu sit.

Per la CGT, totas las vias son pas estadas cavadas com seré estat possible: un projècte de represa menat per l'enterpresa ELFET es estat avançat dempuish 2011, per mei de 300 emplecs. Acompanhat d'una ajuda de l'Estat francés, lo projècte semblava realista. Ça que la, la direccion bloquèt aqueth projècte adara desbrembat, après la dissolucion de la societat ELFET. E juga adara dab los emplegats, en recular shens fin la data de barradura, shens balhar totun nada assegurança per l'avenir.


Pèir-Joan Masdiset