La primièra ministra de Bangladèsh, Sheikh Hasina, vòl repatriar los refugiats rohingyas en Birmania, e aital li o diguèt dimècres a la Nauta Comissària de las Nacions Unidas pels Dreches Umans —l’èx-presidenta chilena Michelle Bachelet— que vesitava lo país. Totun, Bachelet soslinhèt que la situacion en Birmania èra pas l’adeqüata, en apondent que “la repatriacion se deu far volontàriament e dignament, solament quand i aurà de condicions seguras e duradissas”. A mai, Bachelet mostrèt son chepic per “l’aument de la retorica rohingyofòba en Bangladèsh, los estereotipes e los bocs emissaris coma sorsa de delinquéncia e mai de problèmas. La comissària manifestèt son inquietud que “dins un contèxt preelectoral combinat amb de dificultats e incertituds economicas, ne resultèsse mai de discorses d’òdi contra aquelas comunautats vulnerablas”.
 
Pendent sa vesita al camp de refugiats de Cox’s Bazar, un grop de rohingyas demandèron a Bachelet de s’engatjar per trabalhar per de condicions favorablas al retorn en Birmania, e critiquèron lo flac engatjament de l’ÒNU. “L’ÒNU fa coma pòt per vos sosténer”, çò lor respondèt Bachelet en afortissent que lo retorn en Birmania a l’ora d’ara portariá “de violacions dels dreches umans”. A mai, soslinhèt que l’exili rohingya en Bangladèsh aviá agut “un impacte economic e environamental negatiu”.

 

We are very pleased on the visit of UN High Commissioner for Human Rights, @Mrs_Bachelet here in the world's largest refugee camp, Bangladesh to see Rohingya's situation. She met with women, youth, and religious leaders and they requested for urgent repatriation with full rights. pic.twitter.com/FqNRdb2fHy — MW Hoque (@MWHoque) August 18, 2022

The U.N. High Commissioner for human rights, Michelle Bachelet visit #Bangladesh and met with #Rohingya Refugees in the camp housing in Cox’s Bazar. The Refugees hope to go back to Myanmar and have their rights and identity as a citizen of Myanmar. #SEAToday#SEATodayNewspic.twitter.com/kNIbxxy4Kw — SEA Today News (@seatodaynews) August 19, 2022

 

fffff		fffff
	La minoritat mai secutada del Mond   Lo pòble rohingya, de fe musulmana dins un país de majoritat bodista, es objècte d’una persecucion sistematica dempuèi d’annadas. Lo sit Rohingya Vision ofrís d’informacions sul patiment d’aquel pòble e en causa d’aqueles faches, Amnestia Internacionala considèra los rohingyas coma la minoritat mai secutada del Mond.   E mai se qualques istorians los considèran coma los descendents dels comerçants e dels soldats arabis, bengalins, mongòls e turcs convertits a l’islam al sègle XV, las autoritats birmanas considèran que los rohingyas arribèron al país amb la colonizacion britanica, al sègle XIX, en provenença del país vesin de Bangladèsh. En luòc d’èsser reconeguts coma una de las 135 etnias nacionalas de Birmania (las presentas dins lo país abans l’arribada dels britanics en 1823), lo govèrn birman los a sovent tractats d’immigrants illegals. E encara pièger: dempuèi 1982, amb la lei de ciutadanatge de la dictatura militara, son oficialament “apatridas” dins lor país.   Per obténer lo ciutadanatge, lor cal demostrar que son demorats en Birmania pendent seissanta ans, mas normalament òm lor concedís pas de contractes de trabalh ni de papièrs e, doncas, i pòdon pas accedir. Sens ciutadanatge, los rohingyas pòdon pas intrar dins lo sistèma educatiu birman, ni viatjar liurament. Patisson tanben la persecucion dels extremistas birmans bodistas, que los atacan pr’amor que son musulmans. De desenats de milièrs de rohingyas, long dels darrièrs decennis, son estats desplaçats dintre Birmania o lor a calgut fugir cap a Bangladèsh. Dempuèi qualques ans, un dels mejans per s’escapar es de prene de naviris per ensajar d’arribar a las còstas de Tailàndia, Malàisia e Indonesia. Aquestes darrièrs decennis, la terribla situacion dels rohingyas, agravada per d’esclataments periodics de violéncia contra eles en provenença de la majoritat bodista de Birmania (coma en 2012, que daissèron mai de dos cents mòrts e de desenats de milièrs de desplaçats), a provocat que fòrça d’eles fugiscan lo país: siá vèrs Bangladèsh, al nòrd, siá mai recentament vèrs Malàisia, Indonesia e Tailàndia, malgrat los grands perilhs de las traversadas maritimas per i arribar. Dins las darrièras tres annadas soletas, l’Agéncia de l’ÒNU pels Refugiats calcula que mai de cent mila rohingyas an ensajat de pervenir dins aqueles païses.