Lo magazine de cultura en occitan Lo Diari e l'artista Joan Carles Codèrc presentan la primièra galariá d'art occitan en linha. Apelada “La Galariá", s’estrenarà lo 16 d’octòbre al Chorus de Tolosa amb una mòstra, de performanças artisticas, una taula redonda e un concèrt d'Arnaud Cance. Puèi serà totjorn vesitabla sus galaria.lodiari.com.
 
La Galariá cèrca d’èsser un vertadièr espaci d'expression artistica que permetrà de remirar, de partejar o de crompar d'òbras que nos pertòcan o nos fan perpensar a l'entorn de la lenga e la cultura occitanas. Aital, aculhís d'òbras d'artistas que vòlon ensajar de far quicòm amb la lenga nòstra, que venga subjècte, matèria, mejan... del concret a l'intocable, dins una vertadièra quista de sens que rebuta las frontièras de çò qu'una lenga cobrís coma de çò que “fa art”.
 
La question sus las arts visualas en occitan la se pausa dempuèi doas annadas lo collectiu PEL (Praxis Escricha Liura) que s’encarga de la rubrica artistica e poetica de Lo Diari en i presentant d'òbras del moment, variadas, que totas an en comun de carrejar un brieu o un pecic d'occitan.
 
Lo Diari es un magazine cultural bimesadièr de granda qualitat grafica e jornalistica editat per l’Institut d’Estudis Occitans de la region qu’a pres lo nom d’Occitània. I trobaretz d’informacions, d’articles, d’entrevistas, de cronicas, de criticas en occitan.