Dimenge de ser se jogava lo darrier match de la vint e ochenta jornada de campionat de França, entre Marselha e Lion. Mai qu’un encòntre entre dos grands, aquela partida opausèt lo segond e lo tresen de la Liga 1.

Umiliat au Velodròm au match anar 4 a 1, l’OM se deviá de faire un resultat a Gerland ièr de ser. Contracte en partida respectat puei que lei marselhés an obtengut lo ponch dau match nul, 0-0.
 
Lei vesitaires dau ser foguèron lei primiers a l’ataca fàcia a una esquipa lionesa ben crentosa qu’inquietèt pas la defensa marselhesa. Maugrat sa dominacion, Marselha arribèt pas a concretizar seis accions en primier periòde, a l’imatge d’André-Pierre Gignac que manquèt tres còps de dobrir la marca.
 
En segond periòde, Lion tornèt sus lo terren amb mai d’enveja e Marselha deviá recular e subir lo jòc. Pasmens es André Ayew que manquèt la bala de match d’un bòna tèsta, un quart d’ora abans la fin de la partida. Lei marselhés aurián tanben degut beneficiar d’un penalti cinc minutas puei, après una man manifèsta de Biševac dins la superfícia de reparacion, mai l’arbitre dau match, Clément Turpin, ne decidiguèt autrament.
 
Amb aqueu resultat nul, Marselha coma Lion fan pas una bòna operacion au classament, puei que lo PSG a ganhat aquela dimenjada, coma Niça e Bordèu. Lo club parisenc a respectivament 4 e 7 ponchs d’avança sus l’OL e l’OM. Niça es quatrena a egalitat amb Sant Estève. Montpelhièr pèrd tanben de terren après sa desfacha còntra lei niçards. Lei Girondins de Bordèu son tres ponchs darrier. Enfin, Tolosa es encara luenh dei plaças europèas, onzena de la Liga 1.
 
 Lo programa d’aquesta fin de setmana per lei clubs occitans:
 
Marselha – Aiacciu
Montpelhièr – Tròias
Nancí – Niça
Tolosa – Bordèu




Matieu Casanòva