Es mòrt “l’Indian del Trauc”, lo darrièr subrevivent d’una nacion de la zòna protegida de Tanaru, en Amazonia, que viviá tot sol dempuèi 26 ans. L’agéncia brasilièra Funai n’a raportat lo decès après qu’una patrolha lo trobèt. Sembla que s’agís d’una mòrt naturala, que la confirmarà un mètge de la polícia federala de Brasil. Lo còrs èra cobèrt de plumas d’ara roja sus un amac al costat d’una de sas cabanas de palha. Sos afars e sos espleches los an trobats a lor plaça e i aviá la marca de dos lenhièrs. Se’n sabiá pas res dempuèi 2018.
 
“Degun de l'exterior coneissiá pas lo nom d'aquel òme, se sabiá quitament pas grand causa sus son pòble. Ara, amb sa mòrt, se’n completa l’avaliment”, çò a dich Fiona Watson, directritz de recèrcas de Survival International. Watson vesitèt l’airal en 2014 e faguèt lo rapòrt de sa vesita. Aquí, ela verifiquèt que l’òme refusava tot contacte amb d’autres pòbles, originaris o non. Aquela decision d’aver pas cap de contacte es fòrça probablament deguda al fach qu’aquelas nacions se remembran las atrocitats patidas per lors ancessors, dont de masèls e quitament l’esclavatge, segon l’organizacion Survival International.
 
En julhet de 2018, la Funai enregistrèt d’imatges vidèo de l’òme. Aviá aperaquí 50 ans e èra en bona santat. Caçava de pòrcs salvatges, d’aucèls e de monins amb un arc e de sagetas.
 
Dins los ans 1979 e 1980, dins la region de Rondônia, de grands entrepreneires agricòlas (los fazendeiros) ataquèron qualques pòbles indigènas isolats. Fòrça foguèron tuats e d’autres fugiguèron. La darrièra ataca coneguda dels fazendeiros dins aquela region aguèt luòc en 1995 contra una nacion formada de sonque sièis personas. L’Indian del Trauc ne seriá estat lo sol subrevivent.
 
L’agéncia Funai ensagèt alavetz de parlar amb el, mas comprenguèt sul pic qu’el voliá pas comunicar. A partir de 2005, aguèron pas cap de contacte, mas li daissavan d’aisinas per l’ajudar a subreviure.
 
La zòna indigèna de Tanaru, establida legalament en 2015, ten 8070 ectaras de selva protegida. L’agéncia Funai protegís l’airal dempuèi los ans 1990. Los especialistas creson que i a 113 nacions isoladas que vivon dins l’Amazonia brasilièra, dont 27 son confirmadas.
 
 
 

“The Man of the Hole” is a tragic symbol of #Indigenous genocide in #Brazil.

He lived in an area protected by Land Protected Orders, which make it illegal for loggers, miners etc to enter the tribes’ lands.

Now anti-Indig politicians & ranchers want to put an end to the Orders. pic.twitter.com/BQF0GYEPRf

— Survival International (@Survival) August 30, 2022

He endured appalling violence in which everyone close to him was killed.

He lived entirely alone for many years, resisting all attempts at contact.

Now he's dead, and his people's genocide is complete.

A tragic story from Brazil's Amazon:https://t.co/X5YpEHEcbA

— Survival International (@Survival) August 28, 2022