Almens dètz personas mòrtas e una quinzena de nafradas es lo tragic bilanç d’un escotelament multiple qu’aguèt luòc dimenge passat al centre de Canadà. Al total s’es identificat 13 scènas del crime, la majoritat dins la resèrva de la nacion cree de James Smith, e tanben en divèrses endreches de la vila de Weldon, dins la província de Saskatchewan, al centre del país. Es possible que i aja mai de victimas.
 
Segon los primièrs indicis de l’enquista, qualques unas de las victimas foguèron atacadas intencionalament, mas qualques autras foguèron agarridas a l’azard.
 
Las autoritats ensajan de localizar dos suspèctes d’aver perpetrat lo masèl: Damien Sanderson, de 30 ans, e Myles Sanderson, de 31. La polícia los recèrca tanben dins las províncias de Manitòba e Albèrta. (Mesa a jorn a 10h: Damien Sanderson l'an trobat mòrt)
 
La Federacion de las Nacions Indigènas Sobeiranas a indicat que los atacs poirián èsser restacats a las drògas. "Es la destruccion qu’afrontam quand las drògas illegalas nocivas ocupan nòstras comunautats". Pasmens, la polícia ditz que “parlar d’un motiu es extrèmament malaisit ara per ara”, mentre que fòrça victimas foguèron atacadas aleatòriament.