Dempuèi l’acabada de 2019 fins a aqueste estiu, lo projècte Psamides, impulsat per l’Euroregion Pirenèus Mediterranèa, s’es desvolopat e a avalorat diferentas proposicions de transformacion dels pòrts esportius de Lengadòc, Catalonha e las illas Balearas per favorir lor evolucion devèrs d’esquipaments mai duradisses environamentalament e tanben mai eficients, gràcias a de nòvas tecnologias numericas. Un dels pòrts ont s’es ensajat amb succès aquelas mesuras es lo de Seta.
 
Entre d’autras mesuras innovantas dins lo camp environamental, s’es avalorat l'installacion de ponches de distribucion d’aiga e electricitat als vaissèls, qu'an capitat a amendrir lor consum dins los pòrts. Tanben lo foncionament d’aspiradors de degalhs flotants, coma los microplastics. Pertocant lo melhorament de lor eficiéncia, s’es ensajat de tecnologias numericas basadas sus de sensors connectats per la gestion dels pòrts e tanben de sistèmas de deteccion d’ocupacion dels amarratges, çò que representa tanplan un impacte favorable sus l’ecosistèma marin e litoral.
 
La tòca es de sosténer la creissença duradissa e lo potencial de desvolopament economic dels pòrts esportius per mejan de l’aviament de solucions innovairas, mai que mai dins los terrens de la gestion de fluxes toristics, la gestion duradissa de ressorsas e esquipaments, e tota una tièra de servicis adaptats als nòus besonhs dels professionals de la creissença blava e dels usatgièrs dels pòrts. A tèrme long, lo projècte Psamides a l’intencion de crear una comunautat de creissença ecologicament duradissa dels pòrts esportius, en trabalhant suls enjòcs partejats del desvolopament duradís segon un apròchi transnacional.
 
Justament, lo pòrt de Seta aculhiguèt lo 13 d’abril una jornada internacionala organizada per l’Euroregion sus l’ecologizacion del sector de las crosièras, qu’i participèron de manièra presenciala o telematica un centenat d’expèrts sortits de 15 païses de la Mediterranèa.
 
Cal remembrar que lo transpòrt maritim representa una de las activitats mai importantas de l'economia blava per la Mediterranèa. La creissença del sector de las crosièras es mai que poderosa que jamai, e la mar nòstra es tanben una destinacion populara de la navigacion de léser, mas la cal poder rendre compatibla amb la proteccion de sos precioses ecosistèmas, en evitant o en redusissent las emissions de gases e de particulas finas, o la pollucion acostica e luminica qu’a una repercussion sus la fauna e la flòra marinas.
 
Demest d’autras institucions implicadas en aqueste projècte engatjat per l’environament e la transformacion numerica, podèm mençonar lo pòrt de Seta, lo Pòl Mar Tolon Var Tecnologias, Pòrts de la Generalitat de Catalonha e Pòrts de las illas Balearas.

L’Euroregion Pirenèus Mediterranèa es formada per la Region nomenada Occitània, la Generalitat de Catalonha e lo Govèrn de las illas Balearas, e es una institucion que trabalha per mejan de projèctes de cooperacion transfrontalièrs pel benefici d’aqueles tres territòris e de lors ciutadans.