capçalera campanha

Actualitats

InternacionalPoliticaSocietat

Iran: condemnan a mòrt doas activistas LGBT per “corrupcion sus la Tèrra”

Elham Chubdar, de 24 ans, e Zahra Sedighi Hamedani, de 31 ans, son acusadas de “promòure l’omosexualitat”, “promòure lo cristianisme” e comunicar amb “de mèdias contraris a la Republica Islamica”

Zahra Sedighi Hamedani l’arrestèron en octòbre d’arunan al moment que voliá traversar la frontièra amb Turquia. Alavetz, Amnestia Internacionala denoncièt que l’avián detenguda per sas publicacions suls rets socials per aparar los dreches LGBT
Zahra Sedighi Hamedani l’arrestèron en octòbre d’arunan al moment que voliá traversar la frontièra amb Turquia. Alavetz, Amnestia Internacionala denoncièt que l’avián detenguda per sas publicacions suls rets socials per aparar los dreches LGBT

Tèxte legit

La justícia d’Iran a condemnat a la pena capitala doas activistas LGBT pel delicte de “promòure la corrupcion sus la Tèrra”, considerat coma un dels mai grèus del còde penal iranian. Se tracta d’Elham Chubdar, de 24 ans, e Zahra Sedighi Hamedani, de 31 ans que se tròban embarradas dins una preson de femnas de la província d’Urmia, çò rapòrta l’organizacion umanitària curda Hengaw. Amb elas es tanben detenguda Soheila Ashrafi, de 52 ans, que jos la meteissa acusacion espèra lo verdicte, çò precisa l’organizacion.
 
Zahra Sedighi Hamedani l’arrestèron en octòbre d’arunan al moment que voliá traversar la frontièra amb Turquia. Alavetz, Amnestia Internacionala denoncièt que l’avián detenguda per son orientacion sexuala e son identitat de genre, e tanben per sas publicacions suls rets socials per aparar los dreches LGBT. Après sa detencion, Hengaw explica que l’embarrèron pendent dos meses dins una cellula isolada sens drech d’aver un avocat, que patiguèt de secutaments e de menaças de tuar sos dos enfants.
 
Hengaw e d’organizacions LGBT exigisson la liberacion d’aquelas femnas e cridan a la mobilizacion de la comunautat internacionala.
 
Totun, la version oficiala es autra. L’agéncia oficiala d’informacions IRNA assegura que “contràriament a çò publicat suls rets socials, las condemnadas enganèron e trafeguèron amb de femnas e de joventas fòra del país en lor prometent d’oportunitats d’educacion e de trabalh, e provoquèron aital lo suicidi de plusors de lors victimas”.
 
De fach, lo delicte de “promòure la corrupcion sus la Tèrra” es un tèrme fòrça larg per se referir a tota sòrta de delictes. La senténcia de mòrt d’Elham Chubdar e Zahra Sedighi Hamedani especifica que la condemnacion se justicia per “aver promogut l’omosexualitat”, “promogut lo cristianisme” e comunicat amb “de mèdias contraris a la Republica Islamica”.
 
 
 


abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Franc Bardòu
1.

"Pormòure l'omosexualtat"… Qué pòt voler dire aquò. Omosexual, bisexual, eterosexual, assexual, aquò non se causís ni non se decidís, non se concep ni non s'òpta per o contra ! Cossí se pòt tant pèc ? La sexualitat, quina que siá, non es una opcion, mas un constat. Coma la necessitat de manjar, de beure, de respirar. Cossí se poriá corrompre la tèrra en amant ?

Per contra, corrompre la tèrra, per mejan de l'industria e del consumerisme, aquò es fòrça mai clar e aisit de definir ! Mas d'aquò, tota aquela tropelada d'arganhòls que se prenon per "d'amics de dieu" non ne parlan pas gaire…

  • 16
  • 5

Escriu un comentari sus aqueste article