Rabat a negat a quatre parlamentaris lo permés d’intrar dins lo territòri marroquin, que dempuèi el pretendián arribar als territòris ocupats. Los eurodeputats devián complir una mission de verificacion dels dreches umans.

Los quatre eurodeputats que devián vesitar lo Sahara Occidental per fin de verificar la situacion dels dreches umans poguèron pas complir lor mission, lo 6 de març passat, après que la polícia marroquina los empediguèsse d’intrar en Marròc. Los eurodeputats foguèron refusats, en arribar lors dos avions (lo de l’espanhòl Willy Meyer, d’un costat, e lo del cap de la delegacion, l’eslovèn Ivo Vajgl, de l’autre) a l’aeropòrt de Casablanca, que dempuèi ailà pretendián arribar a Al Ayun, capitala del Sahara Occidental.
 
Los eurodeputats, dels grops parlamentaris dels Liberals, dels Verds, de l’Esquèrra Unida Europèa e dels Socialdemocratas, acompanhats de membres de divèrsas ONG, cercavan de vesitar lo Sahara Occidental “en mission d’observacion dels dreches umans”, segon los tèrmes juridics. O fasián en compliment de la resolucion del Parlament Europèu del 7 de febrièr, que lo Parlament Europèu i manifestava “sa preocupacion pel fach que se contunhe de violar los dreches umans dins lo Sahara Occidental”. En consequéncia, se demandava “que se protegi[guèsse] los dreches fondamentals del pòble del Sahara Occidental, compreses la libertat d’associacion, la libertat d’expression e lo drech de manifestacion”; s’exigissiá “la liberacion de totes los presonièrs politics saharauís”; e se soslinhava “lo besonh d’un seguiment internacional de la situacion dels dreches umans dins lo Sahara Occidental”.
 
Los eurodeputats devián manténer de contactes amb de representants de la Mission de las Nacions Unidas per l’Organizacion d’un Referendum dins lo Sahara Occidental (MINURSO), e mai amb diferentas associacions de la societat civila saharauí.
 
Cal dire qu’es pas lo primièr còp que se produsís un incident d’aquelas caracteristicas. De missions precedentas avián recebut de pròvas semblablas de procediment arbitrari e d’illicitud internacionala de las autoritats marroquinas.
 
L'enviat personal del Secretari General de l’ÒNU pel Sahara Occidental, Christopher Ross, a recebut dels eurodeputats una protèsta, joncha amb la sollicitud qu’investigue los faches e qu’incluga sas conclusions en lo dorsièr qu’aurà de presentar al Conselh dels Dreches Umans de las Nacions Unidas.
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.