En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, escotaretz sus las ondas las entrevistas de Pèire Còsta a prepaus del congrès de Regions e Pòbles Solidaris, e de Joan-Miquèu Espinasse sus l’occitan a l’escòla. Lèu, ne publicarem los podcasts sus las paginas d’aqueste quotidian.

Joan-Miquèu Espinasse, sa rintrada coma conselhièr pedagogic
 
Lo departament de Gers compren tres pòls d’ensenhament bilingüe. Un a Plasença, a l’oèst del departament, un autre que se desvolopa pauc a pauc a Vic de Fesensac, e enfin, un tresen a l’Isla de Baish, dins lo sud-èst del departament. Lo marge de desvolopament es puslèu grand en comparason amb d’autres departaments compreses dins l’acadèmia de Tolosa, coma Tarn o Avairon. Avèm volgut veire ont se situa Gers d’aquel punt de vista en companhiá del representant sindical SNUIPP e conselhièr pedagogic Joan-Miquèu Espinasse.
 

 
 
 
Pèire Còsta a prepaus del congrès de Regions e Pòbles Solidaris
 
Es un retorn sus un retorn a las sorsas. Del 26 al 28 d’agost, la federacion de partits autonomistas, regionalistas e independentistas Regions e Pòbles Solidaris faguèt son universitat d’estiu e son congrès a Èx-los-Bens, en Savòia. Es dins aquel país que la federacion foguèt creada en 1994 amb l’occitan Gustau Aliròl coma president. 28 ans mai tard, a la sortida del recampament del burèu, un novèl president foguèt elegit, lo còrs François Alfonsi, eurodeputat de l’Aliança Liura Europèa. Sénher Alfonsi deurà tornar defendre (o pas) las colors d’RPS d’aicí a dos ans a l’escasença de las eleccions continentalas. La federacion entend tanben de se posicionar sus las eleccions senatorialas previstas per l’an que ven. N’avèm charrat amb Pèire Còsta, director de la federacion.