Dins qualques jorns farà dos ans que comencèt lo conflicte en Siria. Dins aqueles 24 meses, almens 70 000 personas son mòrtas e aperaquí un milion de sirians —dont la meitat son d’enfants— lor a calgut fugir. Los refugiats son dins de camps dels païses vesins: Liban, Egipte, Turquia, Iraq e Jordania.
 
Lo cap del Naut Comissiariat de las Nacions Unidas pels Refugiats (NACNUR), António Guterres, ditz que las previsions son encara mai pessimistas. Se calcula que lo nombre de refugiats pòt doblar o quitament triplar ongan se se tròba pas cap de solucion.
 
“Se l’escalada contunha e se se fa pas res per resòlver lo problèma, a la fin de l’an poiriam aver un nombre encara fòrça mai grand de refugiats: dos o tres còps mai dels que i a a l’ora d’ara”, çò diguèt Guterres pendent sa vesita a la capitala turca, Ankara.
 
Al delà de la devastacion de la guèrra, la situacion en Siria genèra una granda tension dins una zòna politicament fòrça fragila. Es çò que diguèt en començament de setmana Guterres a Ankara: “es urgent de metre fin a un conflicte que se pòt acabar en provocant l’explosion de tot lo Pròche Orient”.