A partir de diluns venent, 19 de setembre, los ciutadans russes auràn pas drech de vesitar Estònia, Letònia, Lituània e Polonha, e mai s’an de visats per de païses de l’espaci Schengen. O anoncièron dijòus passat los primièrs ministres d’aqueles païses en tot soslinhar que s'agís d’una posicion comuna. La mesura implica una restriccion de l’intrada als ciutadans russes que viatgen per torisme, cultura, espòrt o afars, per tal de “protegir la politica publica e la seguretat interiora, aital coma la seguretat generala dins l’espaci Schengen”.
 
“Contunham de cercar una posicion comuna al nivèl de l'Union Europèa, e demandam a la Comission Europèa que prepause de mesuras suls visats e sus las restriccions d’intrada que pòscan èsser aplicadas d’un biais unificat per totes los estats membres de l'UE e païses associats a l’espaci Schengen”, çò diguèron en tot precisar que s’agís pas d’una enebicion totala d’intrada.
 
Aital anoncièron “d'excepcions legitimas per dissidents, cases umanitaris, parents de familhas residentas del país, personas amb lo permés de residéncia, facilitacion dels servicis de carga e transpòrt, missions diplomaticas e la circulacion de personas a Kaliningrad, entre tant”. “Remarcam lo besonh de contunhar de sosténer los opausants al regim de Putin e de lor donar d'oportunitats d’abandonar Russia”, çò apondèron.