Lo filme Alcarràs, de la realizaira catalana Carla Simón, concorrerà als 95ns  Oscars que se tendràn lo 12 de març de 2023 a Los Angeles (Estats Units), çò anoncièt dimars setmana l’Acadèmia del Cnèma espanhòla.
 
Rodat integralament en catalan, Alcarràs conta l’istòria de la darrièra culhida de frucha d’una familha dins un domeni de la vila d’Alcarràs, près de Lhèida, abans que los proprietaris i installen de panèls solars. L’istòria s’inspira d'un episòdi de la vida de Simón, que sa maire es originària d’Alcarràs. La realizaira a dedicat lo filme “a totas las petitas familhas d’agricultors que trabalhan la tèrra cada jorn per que la frucha pòsca arribar dins nòstras siètas”.
 
La distribucion del filme es integralament compausada d’actors non professionals engatjats dins los camps del país. Un total de 9000 agricultors participèron al casting.
 
En febrièr passat, Alcarràs emportèt l’Ors d’Aur de la 72a Berlinale, lo festenal internacional de cinèma de Berlin.
 
 
Manipulacion de Wikipèdia del Ministèri de la Defensa estant
 
Tanlèu anonciada la participacion del filme Alcarràs als Oscars, un usatgièr de Wikipèdia modifiquèt l'intrada consagrada a la vila d’Alcarràs, dempuèi una adreiça IP del Ministèri de la Defensa espanhòl, per eliminar e modificar las referéncias als faches que se passèron lo 1r d’octòbre de 2017. Aquel jorn, mentre que s’i debanava lo referendum d’independéncia de Catalonha, la polícia espanhòla ataquèt qualques centenats de personas que defendián pacificament las urnas, en causant un bilanç de 20 personas nafradas.
 
La modificacion, segon çò que se pòt veire dins la quita intrada, se faguèt qualques oras après l’anóncia de l’Acadèmia del Cinèma espanhòla, e s’eliminèt la frasa ont se disiá que “la polícia espanhòla carguèt contra los manifestants per n’evitar la realizacion”, e s’i apondèt lo mot “illegal” al costat de “referendum”.
 
Aquela manipulacion foguèt ça que la lèu detectada, e durèt solament 13 minutas.

 

Alguien desde Ministerio de Defensa ha editado anónimamente 'Alcarrás' en Wikipedia https://t.co/WXHCj7bdUI

— SpainGovedits (@SpainGovedits) September 13, 2022

 

Sembla que el Ministeri de la Veritat ha reescrit la història d’Alcarràs aquest migdia.

Mai que ho tornin a fer, només heu de fer clic a “Mostra l’historial”, a la pàgina d’Alcarràs, trobar l’edició en qüestió i després clic a “desfés”.#lifehack#piolinhackpic.twitter.com/zZ8ejcpP5F

— Josep M. Ganyet (@ganyet) September 13, 2022