Dissabte passat, Andriu de Gavaudan s’inquietava pel resultat electoral de Suècia dins sa tribuna setmanièra a causa de l’influéncia que l’extrèma drecha poiriá aver sul nòu govèrn. Nos a semblat tanben interessant de publicar l’analisi d’Anamaria Dutceac Segesten, mèstra de conferéncias en Estudis Europèus de l’Universitat suedesa de Lund, publicada recentament en anglés dins las paginas de The Conversation.

Amb l’anóncia dels resultats definitius de las eleccions, es ara clar que Suècia aurà un nòu govèrn. Magdalena Andersson, cap socialdemocrata e primièra ministra, a demissionat, e Ulf Kristersson, cap del partit dels conservators de centredrecha (Moderaterna) a ja entamenat de negociacions informalas per veire qui farà partida de son govèrn.
 
Son partit aviá una aliança preelectorala amb los crestians-democratas, los liberals e los democratas suedeses. Lor ambicion declarada es de finalizar en dètz jorns la forma de lor govèrn de coalicion de drecha. Es alavetz que Kristersson serà oficialament confirmat coma nòu primièr ministre.
 
Son prètzfach es pas brica aisit: las divisions intèrnas son ja aparentas. Los democratas suedeses antiimmigracion, dirigits per Jimmie Åkesson, an obtengut mai del 20 % dels vòtes nacionals en tot venir lo segond partit pus grand del país e lo màger de tota la drecha. Pòdon pretendre d’èsser, doncas, un actor important al sen del govèrn.
 
Pasmens, per formar una majoritat parlamentària, Kristersson a besonh del sosten dels liberals, e eles an declarat que sostendrián pas un govèrn ont los democratas suedeses ocupèsson de pòstes ministerials. Lo resultat probable serà un govèrn Kristersson sens preséncia oficiala dels democratas suedeses.
 
Al luòc d’aquò, lo partit antiimmigracion exercirà son influéncia a l’exterior del govèrn pel biais d’un contracte formal amb los conservators. Lo contracte descriurà las politicas que los democratas suedeses desiran de veire començadas en escambi de lor sosten parlamentari.
 
Qualques unas d’aquelas politicas son ja estadas negociadas abans las eleccions, coma de posicions mai duras sus la criminalitat e l’immigracion. Nos podèm esperar a veire que se retire lo ciutadanatge de las personas naturalizadas en Suècia que cometen un crime violent, e que se prepause d’incitacions financièras per encoratjar los immigrants a tornar dins lor país d’origina.
 
 
Ponches litigioses
 
I a pasmens de domenis ont los democratas suedeses e los autres membres del blòc conservator son pas d’acòrdi e ont de posicions comunas seràn de mal debatre. Los conservators, per exemple, vòlon reduire considerablament las ajudas socialas pels caumaires e las personas en comjat de malautiá, mas los democratas suedeses son pas prèstes per o sosténer.
 
Los dos partits son d’acòrdi per reduire lo budget suedés de l’ajuda internacionala e al desvolopament, mas trobaràn l’oposicion dels liberals sus aquel ponch. Los crestians-democratas vòlon contunhar de sosténer financièrament las escòlas religiosas mas los democratas suedeses s’i opausan.
 
E, subretot, las iniciativas climaticas son pas una prioritat pels democratas suedeses, mas figuran en bona plaça dins l’òrdre del jorn dels autres tres partits que compausaràn lo nòu govèrn.
 
La cooperacion amb l’Union Europèa poiriá egalament èsser un ponch de discòrdia. Los democratas suedeses son la votz mai critica de Suècia contra l’UE, mentre que los liberals son los mai prò-UE de totes los partits.
 
 
Suècia e sos vesins
 
Cada còp qu’un partit d’extrèma drecha obten de ganhs electorals, la paur inevitabla es qu’una nacion faga una revirada dramatica pertocant l’immigracion. Mas aqueles resultats semblan mai un epilòg que lo començament d’una nòva istòria.
 
La tendéncia es, dempuèi un cèrt temps, a de politicas migratòrias mai estrictas. Es aital perque lo blòc s’es fach ausir sus almens qualques politicas d’immigracion abans las eleccions.
 
Lo succès dels democratas suedeses antiimmigracion es estat saludat pels partits fraires de la region. Pasmens, en Danemarc e en Finlàndia, per exemple, aqueles partits an perdut lor importància politica dins las darrièras annadas, malgrat de succèsses electorals precòces.
 
En França tanben, la candidata d’extrèma drecha a la presidenciala Marine Le Pen a pas capitat a batre lo candidat de l’establishment Emmanuel Macron, malgrat sa marrida reputacion dins los sondatges d’opinion. E se l’extrèma drecha italiana progrèssa dins los sondatges a mesura que se sarran las eleccions, aquò es largament restacat a la situacion interiora.
 
Aquò vòl pas dire que lo succès dels democratas suedeses daissarà pas cap de tralh dins l’ensemble de la region. Lo partit a proclamat una politica “Suècia d’en primièr” (en fasent resson a l’eslogan “America d’en primièr” de Donald Trump), e nos podèm, per tant, esperar a una reculada dins lo camp internacional se los democratas suedeses exercisson lor influéncia sus la politica exteriora del país. Son eurosceptics e desirarián una reduccion del ròtle de l’Union Europèa dins las politicas interioras dels estats membres.
 
Pasmens, contràriament a fòrça autres partits d’extrèma drecha en Euròpa, los democratas suedeses son pas anti-OTAN e an sostengut la demanda d’adesion de Suècia. E mai los socialdemocratas los acusen d’èsser tròp pròches del govèrn de Putin, es pauc probable que los democratas suedeses càmbien la politica actuala de sosten a Ucraïna.
 
Lors representants votèron al Parlament Europèu contra lo mandadís d’una ajuda financièra de l’UE a Ucraïna per mièg febrièr de 2022, mas aquò se passèt abans l’invasion efectiva del país per las tropas russas. Vistas las nòvas menaças securitàrias, an revisat lor posicion envèrs Ucraïna.
 
Dins l’ensemble, nos podèm esperar a una politica mai virada cap a l’interior en Suècia en seguida d’aquestes resultats electorals, mas es pauc probable que las relacions exterioras del país sián considerablament afectadas pel sosten dels democratas suedeses al govèrn Kristersson.
 
 
 
 
Anamaria Dutceac Segesten
mèstra de conferéncias en estudis europèus de l’Universitat de Lund
Article publicat dins The Conversation lo 15 de setembre de 2022