Lo govèrn espanhòl a mandat una letra al Parlament Europèu per sollicitar la possibilitat d’emplegar lo catalan, lo galhèc e lo basco dins las sesilhas plenièras de la cambra parlamentària del meteis biais que las lengas oficialas que las emplegan los èurodeputats. L’estat espanhòl n’assumirà los còstes de traduccion e interpretacion. Es una de las mesuras pachadas dins la taula de dialòg entre los govèrns catalan e espanhòl a la fin de julhet ont l’executiu de Pedro Sánchez tanben s’engatgèt a promòure lo catalan al Senat espanhòl e a lo protegir a l’escòla.
 
 
S’ignòra l’occitan
 
L’iniciativa, ça que la, sembla d’ignorar de tot en tot l’occitan. Dins la letra mandada al Parlament Europèu, lo ministre dels afars exteriors demanda que “siá possible l’usatge dins la sesilha plenièra del Parlament de las lengas espanhòlas diferentas del castelhan qu’an l’estatut d’oficialas en Espanha”. Puèi, lo Ministèri de la Politica Territoriala precisa dins un comunicat que la letra demanda que “lo catalan, lo galèc e lo basco, coma l’espanhòl, pòscan èsser lengas d’usatge dins las sesilhas plenièras”.
 
Ça que la, l’occitan es tanben lenga oficiala de l’estat espanhòl. La Constitucion d’Espanha estabís l’oficialitat de la lenga castelhana e de las autras lengas reconegudas dins los diferents estatuts d’autonomia. L’Estatut d’Autonomia de Catalonha establís que “la lenga occitana, sonada aranés en Aran” es la lenga pròpria d’aquela val de nòstra país e qu’es oficiala en tota Catalonha.
 
 
A Estrasborg mas non pas a Madrid
 
Se poirà, doncas, parlar basco, galèc e catalan al Parlament Europèu. Mas contunha d’èsser enebit d’o far al Congrès dels Deputats espanhòl. Paradoxalament, lo meteis Partit Socialista que promòu l’emplec de las lengas a Estrasborg, votèt en junh passat contra l’usatge del catalan, de l’occitan, del basco e del galèc dins la cambra  espanhòla dels deputats. Aquel debat menèt a la revòlta lingüistica de certans deputats catalans, galècs e bascos.
 
 
 

Sánchez demana al Parlament Europeu que permeti de fer servir el català als plenshttps://t.co/Xmu9j0gS93

— VilaWeb (@VilaWeb) September 17, 2022

 

La gran estafa sobre ús català, eusquera i gallec al PE és vendre com a avanç de la taula de diàleg el que ja existeix i va fracassar.
Malgrat petició ES (2004), conclusions Consell (2005), acord administratiu (2006), el Parlament Europeu no va autoritzar el català als plenaris. pic.twitter.com/Pyho158tBD

— Christelle Dauvergne (@elle_dau) September 17, 2022