L’adagi ditz qu’a res servís pas de córrer e que val mai de partir a punt. Probable que los rinocèros de Leeds an plan apresa la leiçon. Cinquena al classament, l’esquipa venguèt batre la quatrena, los Dragons, a Brutus. Per la mièja finala, divendres, anèron rescontrar los segonds: los jogaires de Wigan. Passèron lo primièr temps a defendre, defendre e defendre: 4-2 per Wigan a la pausa. A la represa, en dos còps de punhal, marquèron dos ensages transformats. Lo tresena-linha local se rendèt colpable d’una cravata que li valguèt l’exclusion. A 12 contra 13, Wigan capitèt pas de capvirar la situacion e daissèt filar Leeds en finala (20-8).
 
Dissabte, los Sants de Saint Helens recebián los Diables Roges de Salford. Aqueles avián tanben pel cap de prene lo camin d’Old Trafford. A la pausa, St Helens mena 13-6, mas Salford signa un ensag tre lo retorn sus la pelena. La marca de 13-12 va demorar atal una brava mièja orada. Salford capita pas de prene l’avantatge e, a dètz minutas de la fin, un ensag trasformat confirma la qualificacion dels Sants (19-12) qu’espèran d’inscriure pel quatren còp de tira lor nom al bas del trofèu. Caldrà comptar dissabte a Manchester (7 oras del ser a l’ora occitana) amb una fòrta oposicion de Leeds.
 
 
Dragons Catalans: per una autra filosofia de jòc
 
A Perpinhan, se prepara la sason venenta: los pilars Kasiano e Dudson se’n van cap a Warrington; los dos centres Langi e Whare partisson tanben. Joe Chan jonh Melbourne e l’NRL. L’entraïnaire a pas volgut servar lo valent segonda-linha Benjamin Julien e demanda a 3 joves d’anar veire endacòm mai (Cozza, Le Cam e Franco). Se deuriá arribar a un dotzenat de desparts.
 
Las criticas se fan jorn sul jòc estequit e repetitiu prepausat pels Sang e Aur; un jòc tròp sovent “d’una passa”. Lo club es en cèrca de dos tres-quarts-centres solides e imaginatius. L’entraïnaire es pregat de trapar la formula magica entre varietat e eficacitat.
 
 
NRL: las Anguialas e los Lapinons jogaràn las mièjas finalas.
 
En Austràlia, se jogavan las partidas qualificativas per las mièjas finalas.
 
Divendres, Canberra poguèt pas res contra las Anguialas de Parramatta que s’impausèron largament: 40-4. Dissabte, los Lapinons joguèron un ton ensús de las Làmias e se qualifiquèron 38-12. Latran Mitchell ensaquèt las 6 transformacions e ajustèt una penalitat.
 
Las mièjas finalas veiràn las oposicions Vaquièrs-Anguialas (divendres) e Penrith-Lapinons (dissabte).
 
 
Internacional: lo Mondial se prepara activament
 
A la velha de la Copa del Mond, las esquipas anóncian de preseleccions. Pels Blaus, Laurenç Fraissinós ne deuriá parlar en aquesta fin de setmana.
 
Aqueste dimenge 25, a Brisbane, l’esquipa australiana del primièr ministre (amb de jogaires dels clubs eliminats) rescontrarà Papoa-Nòva Guinèa.
 
En Euròpa, los Païses Basses son anats batre Espanha a Getafe: 36-30.
 
 
Temps de represa
 
La sason d’Elèit 1 se lançava aqueste dissabte 17 amb un torneg de rugbí a 9 a Toluges (partidas d’un quart d’ora sul terren costumièr). Las partidas de pola e las mièjas finalas menèron a una finala entre Limós e Dragonets que los audencs ganhèron sus la fin mercé a un ensag de Templeman (14-11).
 
Lo campionat tornarà prene la primièra dimenjada d’octòbre.
 
 
 
 
Alan Roch