En seguida de la draia dobèrta pel govèrn municipal d’Elna (Catalonha), un quinzenat de mai de comunas de Catalonha Nòrd e de Fenolhedés an aprovat durant las darrièras setmanas que s’autorize l’usatge del catalan o de l’occitan dins los conselhs municipals e dins los actes mandats a la prefectura, çò rapòrta Directa. L’iniciativa seguís una iniciativa del Sindicat Intercomunal per la promocion de las lengas catalana e occitana (SIOCCAT) e s’es concretizada qualques jorns abans que lo prefècte dels Pirenèus Orientals faga sa denóncia al Tribunal Administratiu contra la comuna d’Elna. 
 
Lo SIOCCAT es un sindicat de municipalitats que foguèt creat a iniciativa de l’Associacion de cònsols màgers e adjonches dels Pirenèus Orientals, e amassa 116 comunas del departament amb la tòca de promòure l’occitan en Fenolhedés e lo catalan dins la rèsta del departament.
 
Segon l’adjonch al cònsol d’Elna, Pere Manzanares, “almens una quinzena de municipalitats an ja votat la mocion” que la prepausava lo SIOCCAT, dont las vilas occitanas de Trilhan e la Tor de França. Per Manzanares s’agís d’una iniciativa “fòrça importanta perque permet de dobrir de nòvas pòrtas e de far de passes endavant per plaçar lo catalan [e l’occitan] delà lo ròtle de simple decòr”, totjorn segon Directa. A mai, assegura que “dins una societat ont la politica es de qualque biais sacralizada, se los politicians s’exprimisson en catalan publicament benlèu nos sarram mai  del fach que la lenga siá reconeguda per sortir de l’espaci privat”.
 
Iu Escape, conselhièr encargat de cultura a la comuna de Pesillà de la Ribera, presentèt lo passat 13 de setembre la mocion del SIOCCAT al conselh municipal: “A aquel moment çò que s’èra passat amb Elna se sabiá pas, e votèrem la mocion amb solament los tres conselhièrs de l’oposicion contraris dins un ambient fòrça tranquil. Sabèm que benlèu lo prefècte nos demandarà d'o retirar, mas sèm tranquils”, çò soslinha Escape, qu'explica egalament que “seriá fòrça positiu que d’autras comunas aprovèsson aquela mocion. Se sèm trenta, es fòrça mai malaisit d'èsser condemnats que se sèm un o dos. Se nos jonhèm, sèm inaplantables”. Per el, l'iniciativa es fòrça necessària “per rompre l’esquèma mental jacobin, qu'es un andicap terrible dins la societat francesa” e perque “lo monolingüisme es un fren pel desvolopament economic, cultural e uman dins un territòri coma lo nòstre”.
 
De seguir la reaccion dels servicis juridics de la prefectura quan recebràn los actes d’aqueles conselhs municipals en catalan e occitan, e mai sián acompanhats de la traduccion francesa.

 
 
 
 

---

De legir sus Directa: Revolta municipal en defensa de l'ús del català als plenaris de Catalunya Nord



 

Aquests dies s’ha parlat molt de la denúncia de l’Estat contra la vila d’Elna per haver autoritzat l’ús del català als plens i a les actes. A @La_Directa expliquem que com a mínim quinze pobles nord-catalans més han votat el mateix les darreres setmanes. https://t.co/pPUugTsESc

— Pablo Bonat (@pablobonat) September 26, 2022