Los hazaras son un pòble de lenga persana, d'origina asseguradament umana, e son tradicionalament shiitas. Donc son considerat coma d’erètges tant pels amòris talibans sunnitas al poder coma pels decerebrats terroristas de l’organizacion Estat Islamic. Totun vesi mal en qué los talibans integristas al poder, que règnan pel biais de la fòrça e de la terror, son mens terroristas que l'autoproclamat Estat siá disent Islamic…

Sense me voler riscar a contar tròp de necitges, cresi saber que la majoritat dels persofòns d'Asia es de cultura shiita, dins sas doas modalitats, duodecimana (amjoritària) e eptadecimana (minoritària). E una partida dels personfòns compta tanben de zoroastrians, e quitament de crestians nicolaïtas. Entremièg i evoluïsson mai o mens liurament d'Armenians, egalament nicolaïtas, e benlèu (o caldriá totun verificar, de Josieus. I devon demorar entremièg, mai o mens liures, mas tanben mai o mens amagats e secutits, segon los aleae de las politicas religiosas successivas, elas meteissas mai o mens integristas e pègas segon los sègles d'aqueles antics territòris indo-europèus que vegèron passar mantas religions despuèi al mens 3500 ans de civilizacion… Per completar lo panorama, i podèm ajustar los ancians maniqueans, totes exterminats fins al darrièr, e tanben, benlèu, unes bodistas (non sabi se ne demòra encara, mas m'estonariá un pauc).

Ai lo "sentiment" qu'aqueles pòbles, arameans, arabis o persans, que tomban dins las mans de poders integristas religioses, aurián besonh d'unas perspectivas politicas nòvas, lor permetent d'abraçar una modernitat non pas endurada, mas causida e mesurada, que non aguèsse mai la propension a l'alienacion ni comunista, ni capitalista. Mas un tal sistèmi, emai per nosautres, demòra encara d'inventar. E visiblament, aquò manca, terriblament.