La NASA anoncièt dimars passat que Mart aguèt las condicions adeqüatas per la vida, segon las primièras analisis realizadas sus la mòstra de ròca reculhida pel robòt Curiosity. Lo scientific qu’es cap del programa d’exploracion, Michael Meyer, soslinhèt que la Planeta Roja “poguèt albergar de micròbis vius”.

Los scientifics an identificat de sofre, de nitrogèn, d’idrogèn, d’oxigèn, de fosfòr e de carbòni dins las mòstras de la ròca pertusada per Curiosity sus Mart. Qualques unes d’aqueles elements son essencials per la vida. Aquela ròca foguèt causida perque èra al bòrd de çò que seriá un riu ancian.
 
“Una question fondamentala de la mission de Curiosity èra d’amassar d’informacion per saber se sus Mart i auriá agut, dins lo passat, un encastre abitable. Sabèm ara que la responsa es d’òc”, çò diguèt Meyer pendent la conferéncia de premsa.
 
Las claus per aquel entorn abitable venon de las donadas de l’analisi de mòstras de Curiosity. Aquelas donadas indican que l’airal de la Baia de Yellowknife, que l’explòra lo robòt de la NASA, poiriá èsser estada un riu o un lac que poiriá aver porgit l’energia quimica e d’autras condicions favorablas pels micròbis.
 
La ròca se compausa de grun fin que conten de minerals d’argila, de minerals de sulfat e d’autres produches quimics. Aquel encastre umid, a la diferéncia de qualques autres de Mart, es pas extrèmament acid o salat.
 
Dins aquel sens, lo cercaire David Blake diguèt que “los minerals d’argila constituisson almens 20% de la composicion de la mòstra analisada”.
 
Aqueles minerals d’argila se son produches per la reaccion d’aiga relativament doça amb de minerals ignèus, tanben presents dins lo sediment. La reaccion se poiriá que se foguèsse debanada dins lo depaus sedimentari, pendent lo transpòrt dels sediments, o dins la region d’origina dels sediments.
 
La preséncia de sulfat de calci amb l’argila suggerís que lo sòl es nèutre o leugièrament alcalin.
 
Los scientifics se son estonats en trobar aquelas substàncias quimicas que balhan a la superfícia de Mart l’energia sufisenta per que fòrça micròbis qu’existisson sus la Tèrra i pòscan viure.
 
“La gamma d’ingredients quimics que s’es identificada dins la mòstra es impressionanta, e suggerís de maridatges tals coma de sulfats e de sulfurs qu’indican una font d’energia quimica possibla pels microorganismes”, çò diguèt lo cercaire Paul Mahaffy.
 
Davant aqueles resultats, los scientifics vòlon contunhar de trabalhar amb Curiosity dins la Baia de Yellowknife, abans que lo robòt contunhe sa rota establida e faga son long viatge vèrs lo Mont Sharp, lo puèg central del Cratèr Gale.