Coma cada annada, las classas de mairala de las escòlas Calandreta de Puèg Marin e Barbacana de Ciutat se jonguèron al domeni Fontgrande de Carcassona per las vendèmias.
 
Mainatges, regent·a·s e parents se retrobèron per la matinada dins la mira de partejar la docor d’un temps convivial en plena natura.
 
Quin bonaür de menar de matin a l’escòla son pichon ferrat, de cargar sas botas e de se n’anar passejar long del camin que monta a la vinha!
 
Quina dificultat de téner sos cisèls per copar la grapa!
 
Quina fiertat de voidar lo ferrat emplenat dins lo bac bèl amb las recòltas dels companhs.
 
Quina descobèrta de veire tota la recòlta premsada e lo chuc rajar coma per magia!
 
Quin delici de tastar lo chuc caud emplenat de sucre!
 
En fin de matinada diguèrem al reveire als amics novèls de Puèg Marin e tornèrem a l’escòla lo ventre plen e las mans sucradas. La tantossada, quand los pichons dormissián d’un som plan meritat, los mai grands escriguèron un article pel jornal de la classa e diguèron que seriá una plan bona idèa de tornar començar de sortidas per descobrir d’autres luòcs a l’entorn de la novèla escòla e perqué pas convidar los amics de Puèg Marin.
 
Es d’aquí (e un pauc de l’enveja de la còla pedagogica!) qu’es nascuda l’idèa de faire correspondéncia entre las doas classas de mairala Barbacana e Puèg Marin. Aquela correspondéncia va permetre de metre en plaça de rescontres mai regulars entre las doas escòlas, de partejar de projèctes e sustot per cada classa de sortir regularament de l’escòla per menar los pichons a la descobèrta del Mond a l’entorn.
 
Dins un article futur, vos balharem de nòvas d’aquela correspondéncia e sustot de totas la polidas causas qu’avèm descobèrt a travèrs de las nòstras passejadas.
 
 
 
 
Melodia Bellanger,
regenta de la calandreta Barbacana de Ciutat,
classa dels pichons

 
 
 
 
 

Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…