Lo conselh dels ministres d’Haití aprovèt divendres una resolucion que sollicita del cap del govèrn, Ariel Henry, que demandèsse d’ajuda a la comunautat internacionala e a sas fòrças militaras per tal d’afrontar l'inseguretat que la patís lo país a causa de bandas armadas.
 
Lo conselh dels ministres ditz tanben qu’es alarmat pels risques d’una  granda crisi umanitària a causa de la resurgéncia sobda del colèra, aponduda a la deterioracion accelerada de la situacion de seguretat dins tot lo país.
 
Segon aquela resolucion, Ariel Henry deurà sollicitar e obténer dels sòcis internacionals d’Haití un sosten eficaç mejançant lo desplegament immediat de fòrças armadas especializadas per resòlver la crisi umanitària, çò rapòrta Le Nouvelliste.
 
Tanben segon la meteissa resolucion, aquel clima de seguretat deuriá permetre al govèrn de luchar eficaçament contra lo colèra, de promòure la represa de la distribucion de carburant e d’aiga potabla dins tot lo país, lo foncionament dels espitals, lo recomençament de las activitats economicas e de la liura circulacion de las personas e de mèrças e enfin la redobertura de las escòlas.