Aqueste dissabte 15 d’octobre, se jogarà la primièra partida de la Copa del Mond dels XIII a Newcastle amb la partida entre Anglatèrra e Samoa. Seguiràn las partidas Austràlia-Fiji, dissabte tanben; Escòcia-Itàlia, Jamaica-Irlanda, Nòva Zelanda-Liban dimenge; França dintrarà en competicion diluns 17 (7 e mièja del vèspre) a Doncaster fàcia als grècs; Tònga-Papoa, lo dimars 18, e Galas-illas Coook, lo dimècres 19, clavaràn lo primièr torn.
 
Las uèit esquipas femeninas dintraràn en competicion lo 1r de novembre; lo 3 de novembre, serà lo torn de las esquipas de 13-cadieral.
 
Totas las formacions masculinas son arribadas en Anglatèrra e d’unas an jogat una partida de preparacion contra de clubs angleses: los Kiwis an batut Leeds 74-0, partida nulla entre Grècia e Bradford 34-34. Escòcia es batuda pels Cavalièrs angleses 4-28. De rescontres entre formacions participantas an vist  Anglatèrra batre Fiji 50-0 e Liban dominar Galas 38-22.
 
Dissabte, a Halifax, lo XIII de França rescontrèt Tònga. Sio Taukeihao, lo pilar qu’a signat als Dragons Catalans, s’encarguèt de marcar lo primièr ensag dels jogaires dels antipòdes que menan 16-6 a la pausa. La marca passa a 22-12 a l’ora de jòc, puèi los tongans desròtlan per ganhar 48-12.
 
Signe de devolopament del XIII, d’autras partidas an vist Malta batre Bulgaria 50-6 e Alemanha anar batre los Païses Basses 28-22.
 
Darrièr las Pantèras de Penrith qu’an 19 jogaires que participan a la Copa del Mond, los Dragons Catalans presentan 18 jogaires dins la competicion: 13 dins la seleccion francesa, 3 per Anglatèrra (McIlorum, McMeeken, Tomkins), un per Samoa (Tyrone May) e un per las illas Cook (Dylan Napa).
 
 
Trenta sièis arbitres per 3 competicions
 
Quatre arbitres franceses jogaràn del fiulet dins aquelas competicions: dos pel XIII-cadieral: Laurenç Abrial e David Roig; dos per las autras doas competicions: los lesinhaneses Benjamin Casty e Geoffrey Poumès.
 
L’NRL e l’RFL fornisson caduna un desenat d’arbitres. Escoceses e galleses son representats. Tres arbitras femeninas instrumentaràn: Kasey Badger e Belinda Sharpe (Austràlia) e Rochelle Tamarua (Nòva Zelanda).
 
 
Elèit 1: Carcassona e Limós en cap de classament
 
Per la segonda jornada del campionat d’Elèit 1, dissabte, Limós s’impausèt pro ben aisidament als Dragonets sus la pelena de Sant Estève: 38-16.
 
Dimenge, a Domèc, Albi dobrissiá e clavava la marca, mas Carcassona ganha: 20-12.
 
Atal, coma un aire de ja-vist, los dos finalistas de la sason passada s’installan en cap de classament.
 
Suspresa a Sent Gaudenç ont los Orses marcan quatre ensages en un quart d’ora e baton Lesinhan: 30-20. Pià obten sa primièra victòria fàcia a Vilanòva: 34-28. Avinhon mena 18-6 a la pausa fàcia a de tolosans que tornaràn a 18-16, mas perdràn 28-16 fin finala.
 
En cap d’aficha de la tresena jornada, lo dèrbi al Molin dissabte entre l’FC Lesinhan e Carcassona XIII. Se jogaràn tanben las partidas: Albi-Tolosa; Avinhon-Pià; St Gaudenç-Dragonets; Vilanòva-Limós.
 
 
 
 
Alan Roch