Divendres passat, 7 d’octòbre, mai d’una ochantena d’escolans de l’ITEP de Nefiac, de l'escòla Pasteur e del collègi Pierre Fouché d’Illa (Catalonha Nòrd) collectèron de degalhs de l'estanh. Foguèt una de las principalas accions de la campanha Let’s Clean Europe (Netegem Euròpa), qu’organizèt d’accions similaras dins las regions administrativas d’Occitània, de Catalonha e de las illas Balearas.
 
S’agissiá precisament d’una jornada euroregionala de collectatge de degalhs. La tòca de la segonda edicion d’aquela campanha, promoguda per l'Euroregion Pirenèus Mediterranèa, èra de far prene consciéncia de la pollucion de nòstres espacis maritims e aqüatics pels plastics.
 
Aquelas accions de netejatge d’espacis naturals avián una relacion dirècta amb lo parladís de la jornada internacionala “Salvem Mediterranèa” que se tenguèt lo 29 de setembre passat a Montpelhièr, a l’iniciativa de l’Euroregion. Lo principal acòrdi d’aquela amassada transfrontalièra foguèt la creacion d’un observatòri comun per afrontar lo problèma de la pollucion marina pels plastics, amb la futura organizacion d’un forum internacional de la Mediterranèa que comprenguèsse tota l'Union Europèa.
 
L’Euroregion Pirenèus Mediterranèa es una organizacion de cooperacion politica entre lo govèrn de la Generalitat de Catalonha, lo govèrn de las illas Balearas e la region administrativa Occitània, que vòl crear al nòrd-oèst de la Mediterranèa un pòl de desvolopament duradís basat sus l'integracion sociala, environamentala, culturala e economica d’aquel territòri europèu.