Un grop de ciutadans manifestèt dissabte de ser a l’entorns del parlament britanic, a Londres, per reclamar la libertat de Julian Assange, fondator de WikiLeaks. Faguèron una cadena umana, qu’entornegèt la bastissa, coma accion de protèsta per l’anóncia que lo govèrn britanic a acceptat l’extradicion del jornalista als Estats Units, que lo reclaman per aver desvelat de centenats de documents confidencials. L’acusan de 18 delictes d’espionatge e de conspiracion, coma la revelacion de crimes de guèrra comeses en Iraq e Afganistan. Per aqueles delictes als Estats Units lo poirián condemnar a 175 ans de preson. La justícia britanica formulèt formalament l’òrdre d’extradicion en abril passat.
 
Assange se tròba encarcerat ara dins la preson de nauta seguretat de Belmarsh, près de Londres dempuèi abril de 2019. L’arrestèron en 2010 al Reialme Unit per un presumit cas d’abús sexual en Suècia, qu’ara es archivat. Long d’aquestes dètz darrièrs ans aviá viscut confinat, primièr assignat a domicili e puèi refugiat dins l’ambaissada de l’Eqüator a Londres. Mas lo cambiament de govèrn en aquel país american, en 2019, li retirèt la proteccion e d’agents de la polícia britanica lo venguèron arrestar.