Una jurada de Connecticut, als Estats Units, condemnèt dimècres passat lo conspiracionista d’extrèma drecha Alex Jones a pagar 965 milions de dolars a las familhas de las victimas del chaple de l’escòla Sandy Hook. La rason es que Jones assegurèt dins son sit Infowars que i aviá pas agut cap de massacre, mas que tot èra un montatge del govèrn per poder legiferar contra las armas.
 
Lo masèl se passèt en decembre de 2012, quand 26 personas foguèron tuadas per una fusilhada dins una escòla primària de Connecticut, als Estats Units. 20 victimas èran de mainatges. L’autor, un jove d’un vintenat d’ans, èra lo filh d’una professora de l’escòla, que foguèt tanplan tuada dins lo chaple.
 
Dempuèi alavetz, Jones assegura que los parents de las victimas que parlavan als mèdias per tal d’explicar lo massacre èran d’actors qu'aurián fach partida del montatge. Aqueles parents an patit pendent longtemps de secutaments de part dels partisans de Jones. Ara, an fach lors denóncias contra Jones e son entrepresa per los aver difamats.
 
Lo verdicte es estat aculhit coma una granda victòria per las familhas.
 
En agost passat, un tribunal de Tèxas aviá ja condemnat Jones a pagar unes 4,1 milions de dolars per difamacion e 45,2 milions de dolars per damatges punitius. Encara i a una tresena denóncia que lo jutjament se’n deu téner.
 
 
Un sit d’informacions falsas e teorias de la conspiracion
 
Sus Infowars, Jones difond e promòu de nòvas falsas e de teorias de la conspiracion que meton en question non solament de chaples e d'atacs terroristas, mas tanben de faches coma l'arribada de la NASA sus la Luna en 1969, entre fòrça autres exemples. Es un sit web del grand succès que recep aperaquí 10 milions de vesitas mesadièras, fòrça mai que los mèdias tradicionals importants. Las finanças del sit son pas publicas, mas pendent lo jutjament un expèrt a assegurat qu’entre 2016 e 2018 encaissèt 165 milions de dolars. Dins lo jutjament de Tèxas s’èra estimat que lo patrimòni personal de Jones èra d’entre 135 e 270 milions.
 
Ara, Jones cèrca de convéncer sos seguidors que crompen los produches de tota mena que vend dins la botiga virtuala d’Infowars per l'ajudar a pagar las indemnizacions.
 
En 2016, Jones sostenguèt Donald Trump a la presidenciala, e lo 6 de genièr de 2021 faguèt un parladís a Washington per encorajar la multitud a assautar lo Capitòli.
 
 

Conspiracy theorist Alex Jones has been ordered to pay $965 million to Sandy Hook Elementary School shooting victims’ relatives and an FBI agent. The agent said Jones turned their loss and trauma into years of torment.https://t.co/mU5DgqpKe0pic.twitter.com/pROLS98K48

— The Associated Press (@AP) October 13, 2022