Una enquista de la BBC a descobèrt que d’enfants refugiats dins de camps en Siria fan d’emissions en dirècte sus TikTok per demandar d’ajudas financièras e que TikTok encaissa lo 70% dels dons. De son caire, TikTok assolida que prendrà de mesuras contra “la mendicitat esplechaira” qu’es pas permesa sus la plataforma e que la comission prelevada suls presents en linha es fòrça inferiora al 70%, mas sens ne precisar lo percentatge exacte.
 
Pendent cinc meses la BBC a seguit 30 comptes de TikTok que fasián d’emissions en dirècte dels camps de refugiats, e a determinat que cadun recebiá de presents numerics de valor de fins a 1000 èuros per ora. Mas las familhas an assegurat qu’avián recebut una pichona part d’aqueles dons.
 
Los reportèrs an verificat que dins de camps del nòrd-oèst de Siria los diches “intermediaris de TikTok” fornissián a las familhas de telefòns intelligents e d’autres espleches necessaris per far las emissions en dirècte. Aquelas personas disián als refugiats que trabalhavan per d’agéncias pròchas de TikTok, e que lor trabalh èra d’engatjar de personas per realizar d’emissions en dirècte qu’incitèsson los usatgièrs a èsser connectats sul ret social. Los telefòns que donavan als refugiats portarián, segon l’enquista, de cartas SIM britanicas pr’amor que l’algorisme de TikTok suggerís los contenguts en foncion de l'origina geografica, del numèro de telefòn e qu’a mai, los britanics son los donators mai generoses.
 
 
106 dolars venon 19
 
Per verificar la comission que la prelèva TikTok, un reportèr obtenguèt un d’aqueles telefòns e un compte sus TikTok. De la BBC de Londres li mandèron un present de 106 dolars. A la fin de l’emission, lo compte del reportèr èra de 33 dolars, valent a dire que TikTok aviá emportat lo 69% de la valor dels presents. A mai, lor calguèt levar un 10% de comission al moment de retirar en moneda aquel argent. Per tant, se faguèt un don de 106 dolars mas n’arribèron pas que 19.
 
Las organizacions umanitàrias que trabalhan dins los camps de refugiats an admés que per fòrça refugiats demandar d’almòina en linha es una de las solas opcions qu’ajan, e mai se los intermediaris encaissan la màjoritat de l’argent.
 
 

Our investigation found children in camps in Syria are begging on TikTok Lives - while TikTok takes 70% of donations given to them. It’s taken months of work with @BBCArabic and BBC Eye to shed light on this… here’s how we found out  https://t.co/raD60I7Cvt

— Hannah Gelbart (@hannah_gelbart) October 12, 2022