Lo fisician espanhòl Antonio Turiel lança, de Tolosa estant, una crida a la mobilizacion e a l’ocupacion del debat public. Segon son analisi, la penúria del petròli, e de l’energia en general, es fòrça pus grèva que çò que pensam, e d’aicí a qualques setmanas poiriam viure una situacion tan grèva que se perdriá d’emplecs e quitament se patiriá la fam e lo freg. Per Turiel, una situacion talament desesperanta profechariá al faissisme que prendriá tot l’espaci del debat public que l’ecologisme auriá pas atench, perque, çò assolida, l’extrèma drecha “profiècha del desespèr e promet de solucions simplas a de problèmas complicats, amb de discorses d’asirança, de ressentiment, de repression e d’autoritarisme”.
 
Dins un article publicat dins son blòg, Turiel assegura que la situacion en Euròpa es mai critica qu’imaginam, mentre que los dirigents nos recomandan de crompar de tricòts de lana per passar l’ivèrn. Lo scientific analisa la situacion de l’energia, fornís de donadas de la produccion d’electricitat, rapòrta la reduccion de la produccion de l’OPÈP e la situacion critica que la viu la societat alemanda BASF, que ne depend gaireben tota l’indústria europèa car es lo provesidor de plastics, de dissolvents, de reactius per la metallurgia, de medicaments, etc.