La plataforma que financèt la campanha d’Obama amb la condicion de crear la lei SOPA (que limitava fòrça l’obtencion de filmes e de sèrias sus Internet) e aital impausar lo concèpte d’streaming, a anonciada l’aviada de son ofèrta amb publicitat. L’intencion es de recuperar d’abonats pr’amor que, dempuèi lo segond trimèstre de 2022, n’a perduts a un ritme alarmant. Malgrat de grands profièches economics, l’entrepresa a practicats fòrça talhs coma la supression dels departaments de diversitat que se consagravan a inclure çò que los estatsunidencs considèran coma de minoritats.
 
Per poder baissar lo prètz de l’abonament en encaissant la meteissa soma d’argent, Netflix a aviada una ofèrta amb publicitat que costarà 5,99 èuros e qu’a apelat “Ofèrta Basica amb Publicitat”; serà disponibla per mièg novembre. La meteissa estrategia l’a anonciada Disney per sa plataforma Disney+, amb la diferéncia que l’abonament serà de 7,99 euros amb publicitat (çò que còsta l’ofèrta basica actualament). A mai, Netflix contunharà de prepausar las autras ofèrtas, coma la basica (7,99 euros), l’estandard (12,99 euros) e la premium (17,99 euros).
 
Lo temps mejan de publicitat serà de 5 minutas per ora amb d’anóncias de 15 a 30 segondas al començament e a la fin del filme del capítol de la sèria. La publicitat que se porgirà a l’espectator serà seleccionada per un sistèma intelligent qu’analisarà los gostes de l’abonat e li mostrarà çò que lo pòt interessar mai. Mas i aurà de contenguts que restaràn excluses del visionatge e tanpauc se poirà pas descargar de contenguts per los veire quand l’abonat es pas connectat a Internet (çò que poirà far, per contra, amb las autras ofèrtas).
 
Amb la novèla ofèrta se poirà visionar los produches de la plataforma a la television, sus telefòn mobil o sus tauleta amb una qualitat de 720p/HD.
 
Aquela modalitat es estada desvolopada amb la collaboracion de Microsoft.
 
 
 
 
Manèl Navarro