Après qualques setmanas de cauma dins lo sector de las rafinariás, l’estat francés viu uèi una jornada de cauma interprofessionala convocada per l’intersindicala seguida mai que pels sectors del transpòrt estradièr e ferroviari, de l’educacion, del nuclear, dels ostals de retirada... Los convocaires, dont la CGT, FO, Solidaris e l’FSU, evitan de prononciar la paraula “cauma generala” mas asseguran que la mobilizacion de uèi marcarà “un abans e après”.
 
La revendicacion màger es l’aument dels salaris dins un encastre d’inflacion e sustot la defensa del drech de cauma; se condemna que lo govèrn francés obligue los salariats de las rafinariás d’anar a lor emplec per evitar la penúria de combustible. De notar que dins l’educacion se critica en particular la reforma venenta de l’ensenhament professional.
 
La cauma l’a precedida una granda marcha que se tenguèt dimenge passat a París, convocada per La França Insomesa amb la tòca d’exigir del govèrn de mesuras contra la pèrda de poder de crompa consecutiva a l’inflacion.