Dempuèi qualques jorns, l’armada russa ataca las vilas ucraïnesas amb de drònes kamikaze. De fach, l’armada d’Ucraïna s’es tanben servida dels drònes d’aquela mena que son venguts la nòva arma d’aquela guèrra. Russia los a crompats a Iran e, segon d’informacions ucraïnesas, n’auriá crompats 2400. Los atacs an daissat sens aiga e electricitat mai d’una vila d’Ucraïna, dont Kyiv, e sembla que l’estrategia del Kremlin cèrca de desmoralizar la societat ucraïnesa en la forçant a suportar un ivèrn freg e sorn. Mas que son aqueles drònes?
 

Los drònes kamikaze son de pichonas armas volantas que s’autodestruson après tocar lor buta. A la diferéncia dels drònes tradicionals, que son mai grands e tornan a lor posicion tanlèu lançar lo missil, aqueles pichons drònes se pòdon detectar mens facilament per radar e programar per aténher d'objectius sens cap d’intervencion umana.
 
Los drònes kamikaze tustan lor tòca per mejan de coordenadas GPS programadas abans l’enaurament. Per aquesta rason s’emplegan contra de butas fixas e non pas en movement. Vòlan bas e rapid e pòdon percórrer de milièrs de quilomètres.
 
Aquestas darrièras setmanas, Russia a utilizat lo modèl iranian Shahed 136, renomenat Geran-2 en rus. En persan, shahed vòl dire martir, una allusion al caractèr autodestruseire de l’arma. Lo Shahed 136 es estat emplegat per Iemèn en la guèrra contra l’Arabia Saudita dins las zònas contarotladas pels huthis.
 
De son caire, Ucraïna se servís de drònes turcs Baraktyar TB-2, que son fòrça melhors. Mas lo principal avantatge dels drònes iranians es que son fòrça mens cars, 20 000 dolars per unitat. A mai, aquela arma se pòt lançar de cinc en cinc amb qualques èrsas a l’encòp, çò que permet un atac en un eissam de drònes que complica la responsa de las defensas antiaerianas rivalas.
 
 

Voici le fragment de l'un des drones tirés ce matin dans le quartier de Shevchenkiv, en plein centre-ville de Kiev. La mention "Géranium-2" ("Герань-2") est le nom utilisé par les Russes pour renommer les drones Shahed-136 livrés par l'Iran, qui visent prioritairement des civils. pic.twitter.com/Od973HzCFO

— Bruno Tranchant (@ogamashiyo) October 17, 2022