En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, escotaretz sus las ondas l’entrevista de Katy Bernard, mèstra de conferéncias especializada en literatura medievala occitana a l’Universitat de Bordèu, a prepaus de son òbra Lo Cant de Montfòrt, que presentàvem ièr dissabte sus las paginas d’aqueste quotidian en linha.

L’ensenhaira e medievista Katy Bernard  contunha son exploracion de l’edat classica occitana. En mai de son trabalh de vulgarizacion a l’entorn dels grands personatges de la maison d’Aquitània coma lo duc Guilhèm IX o sa felena Alienòr en passant pel trobador mesconegut Rigaut de Berbezilh, l’universitària bordalesa s’es interessada al quite Simon de Montfòrt! En 2013, creèt un espectacle de lecturas de tròces de la Cançon de la Crosada a l’entorn del cap de las armadas francesas. Ven d’èsser publicat jos la forma d’un libre CD en cò de l’IEO Novelum, seccion peiregòrda de l’Institut d’Estudis Occitans. L’autora nos a explicat primièr çò que l’a interessada en lo borrèl del còr d’Occitània.








 

---

BERNARD,Katy. Lo Cant de Montfòrt. Novelum IEO Perigòrd, Presse Fédéraliste, 2022. Libre e CD. 22 èuros.