Los 19 e 20 d’octòbre, se tenguèt a l’Universitat de Corti un simpòsi nomenat: “La corsofonizacion per l’escòla: metòdes, comparasons e planificacions”.
 
Lo programa èra plan cargat mas tras qu’interessant. Las intervencions del dimècres viravan a l’entorn de las experiéncias internacionalas a prepaus de bilingüisme a l’escòla, e pauc a cha pauc, long dels expausats dels especialistas e cercaires que venián de País de Galas, de Catalonha, de Val d’Aòsta, del Bascoat, de Bretanha e de Corsega, una evidéncia s’es dessenhada, apiejada plan solidament sus las donadas e estudis presentats: lo melhor biais de recuperar de locutors d’una lenga minorizada es l’immersion. E de luènh!
 
Los practicians que parlèron la tantossada illustrèron encara mai aquel fach, particularament una jove professora de las escòlas, Serena Guaitella, que contèt qu’aviá ensenhat dos ans dins una escòla immersiva publica, mas que l’encastre ajudava pas, particularament l’injoncion de parlar lo 25% del temps en francés. Deçaupuda dels resultats cap a l’empleg de la lenga còrsa pels mainatges, se mandèt dins l’aventura Scola Corsa, e dos ans apuèi, èra espantada del resultats de l’escòla immersiva associativa.
 
 APRENE presentèt qualques aisinas de la formacion cooperativa de mèstres que met en òbra: la poténcia de l’espaci de trabalh cooperatiu Estelum, l’eficacitat de l’avaloracion e de la validacion dels estudiants sens cap de nòtas, la pertinéncia del dispositiu “camin de lenga” per capitar d’aver de regentas e regents que pòrten vertadièrament la lenga occitana.
 
L’endeman, lo dijòus 20, una taula redonda de doas oras de temps acampèt de mond de l’Universitat Pasquale Paoli, Ghjaseppu Turchini, lo president de Scola Sorsa e tanben de l’associacion dels ensenhaires de còrs, Antonia Luciani e Romain Colonna del conselh executiu de la Collectivitat Territoriala de Corsega, e lo rector de l’acadèmia de Corsega.
 
De matin, lo deputat europèu Alfonsi aviá plan enfonzat lo clavèl: “Lo sol biais de salvar la lenga còrsa passa pel sosten a Scola Corsa per assegurar son desvolopament. Nos cal plan capitar en dètz ans çò que los bascos faguèron en 50 ans”.
 
La taula redonda foguèt plan animada, coma se podiá a la vista de la qualitat dels intervenents.
 
Mas quand Ghjaseppu Turchini prenguèt la paraula per contar cossí la constatacion de l’incapacitat de l’escòla publica per formar de locutors de còrs l’aviá menat a decidir, amb una còla plan determinada e solida, de fargar Scola Corsa, o faguèt amb talament de vòlha e d’emocion, que l’afar èra plegat.
 
Lo rector n’arribèt quitament a li demandar se voliá pas pairinar una o doas escòlas immersivas del public per las ajudar a capitar!
 
APRENE afortiguèt puèi que l’ISLRF aviá la plena capacitat per formar de mond a l’immersion, d’aitan mai que l’acòrdi quadre amb lo malhum dels INSPE reconeis un percors de mastèr MEÈF immersiu.
 
La jornada s’acabèt amb una sintèsi de naut nivèl assegurada per Nicolas Sorba e Alanu Di Meglio, professors de l’Universitat Paoli.
 
APRENE contunharà d’ajudar a la formacion pedagogica dels ensenhaires e del personal de Scola Corsa.
 
Aqueste collòqui comptarà de segur dins l’istòria de l’ensenhament del còrs. Quicòm s’es passat de plan important: es estat un grand pas endavant per la reconeissença oficiala de la granda eficacitat de las escòlas associativas immersivas de l’ISLRF.
 
E encara mai important: los actors de l’ensenhament del còrs sostenon ara la linha immersiva.
 
 
 
 
Patrici Baccou,
codirector d’APRENE
 
 
 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…