Aplant del transpòrt public en protèsta per un trabalhador agarrit
 
Ièr, dimècres de matin, los trabalhadors de la Regida dels Transpòrts de Marselha (RTM) arrestèron lo servici d’autobuses e de tramvai, e lo mètro se vegèt fòrtament afectat. Los trabalhadors de l’RTM protestavan aital contra l’agression d’un menaire d’autobús. L’òme, d’aperaquí 40 ans, foguèt agarrit a la cara amb una arma blanca dimars passat al 6n arredondiment de Marselha, en avent de besonh de 14 ponches de sutura. L’agressor presumit es un adolescent nascut en 1999 que foguèt interpelat sul pic. Lo menor declarèt que li lancèt lo cotèl a la cara, en seguida d’una discussion provocada per “una actitud agressiva del menaire”.
 
 
Dos mòrts en una fusilhada de Kalashnikov
 
Mentre que lo transpòrt public èra en protèsta, dos joves foguèron tuats e un tresen grèvament ferit al còr a la Ciutat dei Blavets, dins lo 13n arredondiment marselhés, dins l’encastre del tresen reglament de comptes en mens de quinze jorns. Segon Jacques Dallest, procuraire de la Republica, los faches se debanèron “amb d’armas de ponh e d’armas longas, supausam d’una Kalashnikov”. Dallest expliquèt que “tres joves de 21 ans foguèron vistes per un grop a bòrd d’un veïcul qu’es estat trobat cremat”. Segon las explicacions de Dallest, los tres joves foguèron “executats” dempuèi lo veïcul. Dos moriguèron e lo tresen foguèt portat ferit a l’espital. “Çò que nos preocupa es que se siá produsit en plen jorn, un dimècres, en preséncia d’enfants”, çò soslinhèt Dallest.
 
 
Un detengut liberat de Lei Baumetas e tuat davant la preson
 
Lo 9 de març, de matin, un òme foguèt tuat per bala davant la preson de Lei Baumetas, a Marselha, al moment que veniá de ne sortir, jols uèlhs de testimònis.
 
 
Dos reglaments de comptes precedents
 
Dètz jorns abans, un jove de 23 ans, que sortissiá de la preson en regim de semilibertat, tanben foguèt assassinat d’un còp de fusilh sus la cara dins una ciutat dels Quartièrs Nòrd, a Marselha.
 
Al delà, un còrs carbonizat e plen d’impactes de balas èra ja estat descobèrt per de passejaires dins lo Bòsc de Flaçan d’Içòla (Brinholenc). Segon l’identificacion del còrs, s’agissiá d’un resident dels Quartièrs Nòrd de Marselha “fòrça desfavorablament conegut per la polícia, especialament per diferentas questions de dròga”, segon de fonts pròchas del dorsièr.
 
 
Drama familial en Cevenas
 
Un drama familial se produsiguèt ièr vèrs 17h dins lo petit vilatge de Chambon, al costat de Becejas (Cevenas). Per de rasons encara desconegudas, un òme d’aperaquí 70 ans tirèt sus un autre òme abans de se suicidar. S’agís d’un oncle e d’un nebot, segon de fonts pròchas de l’enquèsta que parlan de rivalitat de vesinatge.
 
 
Violéncia creissenta
 
L’an 2012 foguèt particularament violent. Los reglaments de comptes faguèron 24 mòrts dins lo País Marselhés. En genièr se produsiguèron ja doas temptativas de reglament de comptes amb Kalashnikov.
 
Los responsables policièrs parlan de mai de vigilància e d’engatjar los vesins a denonciar. Lo prefècte parla d’operacions dins las vilas que fan partida de las zònas de seguretat prioritària (ZSP) e l’estat vòl tutelar Marselha amb mai de policièrs, una ZSP e l’estatut de metropòli.
 
Ça que la, se parla pas de la manca de servicis socials dins l’airal mai densament poblat del país, qu’amb las màfias del narcotrafec, poirián èsser —probable— l’origina d’aquelas violéncias creissentas.