Catalonha Ràdio que difonerà diuendres un podcast en occitan aranés sus era musica occitana que serà disponible en web e ena aplicacion de Catalonha Ràdio. Era emission, entitolada “Sons occitans”, serà dirigida e presentada pera jornalista Anna Geli, e comprenerà 46 capítols de mieja ora consagradi ara musica en occitan de toti es estils e en toti es accents.
 
“Sons occitans” que permeterà de descorbir, per exemple, quina ei era cançon qu’a mès de versions occitanes e era realitat istorica amagada laguens dera cançon de Joan Petit, que harà a descorbir tanben eth roman de Flamenca qu’inspirèc un album dera cantadora Rosalía, e que revelarà  classics coma Dafnís e Alcimadura o eth Reiaume Desbrembat de Jordi Savall. Mès sustot es auditors que poderàn conéisher era Naua Cançon occitana, quina sòrta de rap o hip-hop se hè en país, quini son es poètes mès cantadi, es cançons tradicionaus de hemnes, de trabalh, deth temps, d’amor...
 
Ei atau que sonaràn bandes coma Lou Seriol, Lou Dalfin, Duo Brotto Lopez, Joanda, Alidé Sans, Bramatopin, La Talvera, Mossu T e lei Jovents, El Pont d’Arcalís, Joan Francés Tisnèr, La Mal Coiffée, Lo Còr de la Plana, Goulamas'k, Cocanha, Marcel Amont, los Òc Brigada Internacionala, Massilia Sound, System, Nadau, Balaguèra, Rodin Kauffman, Familha Artús, Uèi, Rosina de Pèira, Claudi Martí e tantes d’autes.


 

"Sons occitans". Eth nau pòdcast musicau en #aranés. A compdar de diuendres ena web e era app de Catalunya Ràdio. Aciu òc que mos i traparam toti  https://t.co/BwavDSaDRD

— Anna Geli (@geli_anna) October 24, 2022