Luiz Inácio Lula da Silva a ganhat l’eleccion de Brasil e serà pel tresen còp lo president del grand país sud-american. Totun, la diferéncia entre el e lo candidat de la drecha, Jair Bolsonaro, es estat de mens de dos ponches percentuals; Lula a obtengut lo 50,9% dels vòtes e Bolsonaro lo 49,1%.
 
Al total, dos milions de vòtes an separat los dos candidats.  S'agís doncas de la presidenciala mai sarrada de l’istòria brasilièra. Es tanben lo primièr còp qu'un president de Brasil es pas reelegit per un segond mandat dempuèi que la Constitucion o permet.
 
Tanlèu conéisser lo resultat, dins la nuèch de dimenge a diluns, Lula compareguèt per far un long discors ont diguèt qu'amb aquel resultat èra “tornat lo Brasil que lo Mond esperava”, e prometèt de “governar per totes los brasilièrs”. Conscient de la situacion creada per la campanha, lo nòu president, que prendrà possession lo 1r de genièr, diguèt qu'ensajariá de promòure la reconciliacion e que i a pas dos Brasils. Lula, que faguèt fòrça referéncias a Dieu e la religion, foguèt especialament clar sus la preservacion d’Amazonia e la lucha contra lo cambiament climatic, un dels tèmas que lo diferéncian mai de Bolsonaro.
 
De veire se Bolsonaro acceptarà lo resultat. Pendent la campanha faguèt coma Donald Trump als Estats Units, en tot semenar la mesfisança envèrs lo sistèma electoral brasilièr, e sos partisans an cometèron d'actes de violéncia. Lo quite jorn del vòte, una deputada bolsonarista menacèt de seguidors de Lula amb un pistolet.
 
Per regions, Lula a ganhat amb fòrça clartat al nòrd-èst e Bolsonaro dins las grandas vilas, Rio de Janeiro e São Paulo, a mai del sud e dins los airals periferics d’Amazonia.