Lo primièr ministre de la Republica d’Armènia Nikol Pashinyan, lo president de Russia, Vladimir Putin, e lo president d’Azerbaitjan, Ilham Aliyev, se son reünits a Sochi per pachar de se servir pas de la fòrça en Artsakh, un territòri tanben conegut coma lo Naut Karabagh, ont la populacion es majoritàriament armènia e qu’es en conflicte dempuèi 1988 quand decidiguèt de se separar de la region d’Azerbaitjan, qu’alavetz èra integrada dins l’Union Sovietica. En novembre de 2020, una bona part d’Artsakh foguèt tornarmai ocupat per Azerbaitjan après una guèrra plan violenta.
 
La declaracion ditz que se merceja las tropas russas situadas dins la region per aver mantengut la patz e que se decidís de resòlver pacificament las reconeissenças mutualas de sobeiranetat, integritat terroritoriala e frontièras.
 
Totun, los govèrns d’Armenia e d’Azerbaitjan devon encara pervenir a un acòrdi sus qualques detalhs coma las questions restacadas a la seguretat e als dreches dels armènis que demòran en Artsakh o lo retirament de las tropas azèris d’Armenia.
 
Mentretant a Stepanakert, capitala d’Artsakh, i aguèt dimenge passat una molonada de manifestants que revendicavan l’independéncia d’Azerbaitjan.
 
 
Sosten del PNO als armènis
 
Lo Partit de la Nacion Occitana (PNO) publiquèt fa doas setmanas un comunicat que criticava l’invasion azèri, lo sosten de Turquia a aquela invasion e revendicava lo retorn dels armènis en diaspòra e la reconeissença del genocidi dels armènis per Turquia.