Los uelhs de l’Ador, qu’ei lo títol provisòri deu filme de LOULA productions, coproduit per Òc Tèle et TV7. Damien Lagouardette (realizaire e scenarista deu filme) e Camille Louvet (productritz) que son a l’origina d’aqueth projècte concretizat aquera fin d’octobre pròche d’a lor, a Senta Maria de Gòssa (Maremna).

La hèita
 
Un grop de musica naturau[1] compausat de 4 musicians que passa quauques dias dens ua aubèrja sus un cantèr d’Ador entà preparar un navèth album.
 
Tot que’s passa plan quan lo comportament estranh de l’òste e l’acumulacion de bruts e aparicions inexplicats van miar los 4 protagonistas au còr d’un secret guardat de plan.
 
 
Ua esquipa au top
 
Arron 5 dias de rodatge, lo realizaire que’s felicita de la resulta: “Los imatges que son beròis e l’intencion deus actors qu’ei au rendetz-vos. Que n’èm suber aürós!”
 
Que cau díser que lo quadre (las Bartas d’Ador) ne manca pas d’encant, que los tecnicians e las tecnicianas son estats hèra eficaç e pacients e qu’ua bera complicitat s’ei rapidament installada enter los actors e las actoras. Au demiei d’aqueths, que trobam ua majoritat de gascons com Frédéric Handy, qui s’ei hèit conéisher sus Òc Tèle, Pèir-Arnaut Grosclaude Lapléchère, l’estela de la navera generacion d’actors occitanofòns, e Julien Cabarry, un famós musician e cantador lengadocian, Arnaud Cance e enfin ua actritz professionau e realizaira peiregòrda: Marlène Veyriras (Crimes parfaits, Scènes de ménage, etc.). Qu’aparéishen tanben Jean-Luc Landi (autor e traductor) e Danielle Loustaunau (ua de las eroïnas de la sèria a paréisher hèra lèu, Lo Banc d’Eva Cassagnet).
 
 
Un budget sarrat
 
Dab 15 000 èuros, qu’èra un desfís màger entà Damien e Camille d’organizar lo rodatge.
 
Lotjar, pagar e neurir 11 actors et 12 tecnicians n’èra pas aisit.
 
“Que caló comptar sus ua gran ajuda familhau de l’ua part (prèst de la maison, gestion deus repaish) e amicau de l’auta part tà un sarròt de bricòlas pròpias au filme”, çò explica Camille.
 
La rason: ua dificultat patenta a trobar finançaments tà un cortmetratge, quan seré en lenga occitana.
 
Lo film, qui ei ua ficcion mes basada sus hèits vertadèrs, que serà vededer sus Òc Tèle e TV7.
 
 
 
 
JC