Lo ministre de la defensa de Polonha, Mariusz Blaszczak, a anonciat qu'avián començat los trabalhs per bastir una barrièra sus la frontièra de 210 quilomètres que parteja amb l’enclavament rus de Kaliningrad. Segon Blaszczak, l’iniciativa seguís una decision presa durant una sesilha de seguretat del conselh dels ministres, après l’arribada a l’aeropòrt de Kaliningrad de vòls sortits del nòrd d’Africa e de l’Orient Mejan.
 
Lo ministre polonés precisa que serà una barrièra temporària de tres barralhas d’aram espinut. “Coma las qu’emplegan de militars del Mond entièr", çò a dich. Es semblabla a la que la bastiguèt ja Polonha al començament de l’an sus la frontièra amb Bielorussia.
 
Polonha e Lituània avián acusat Bielorussia d’aver organizat un flux migratòri artificial de refugiats venguts d’Iraq, Siria e Afganistan en represalhas a las sancions impausadas per l’UE a causa de la repression de las protèstas pel resultat de l’eleccion d’agost de 2020; alavetz lo president Alexandr Lukashenko aviá fach confirmar son mandat e forçat a l’exili son adversària, Svetlana Tikhanovskaia. Ara Polonha acusa Russia d’emplegar la meteissa manòbra per aver sostengut Ucraïna.